Fýtboldan birinshi lıgada «Kaspıı» birinshi orynǵa kóterildi

ASTANA. KAZINFORM — Fýtboldan Birinshi lıga komandalary arasyndaǵy Qazaqstan chempıonatynyń 6-týrynyń alǵashqy oıyn kúni aıaqtaldy.

15 naýryzda aqtaýlyq «Kaspıı» óz alańynda «Túrkistan» komandasyn qabyldady. Kezdesý barysynda aqtaýlyq komandadan Baýyrjan Baıtana 25, Mıras Turlybek 45, 68, Nurǵaını Bóribaev 71-mınýtta tórt gol soqty.

Osylaısha «Kaspıı» qarsylasynan 4:0 esebimen basym túsip, týrnır kestesinde 15 upaımen birinshi orynǵa kóterildi. 

Ótken týrda aqtaýlyq klýb óz alańynda «Altaıǵa» (1:2) ese jiberip qoıǵan edi.

Sondaı-aq búgin almatylyq AKAS óz alańynda «Ekibastuzdy» 2:0 esebimen jeńse, Túrkistan oblysynyń «Jetisaıy» men Pavlodardyń «Ertisi» 1:1 esebine qanaǵat bildirdi.

Endi 16 naýryzda «Altaı» (Óskemen) men «Qaırat-2» (Almaty), «Akademııa Ońtústik» (Shymkent) pen «Han táńiri» (Almaty), «Taraz» ben «SD Family» (Almaty), «Shahter» (Qaraǵandy) men «Aqtóbe-2» kezdesedi.

Eske salsaq, «Astana» men «Qaırat» fýtboldan Qazaqstan kýbogyndaǵy joryǵyn shırek fınalda aıaqtady.