Fýtboldan birinshi lıgada «Kaspıı» alty týr boıy jeńiske jete almaı keledi

ASTANA. KAZINFORM — Fýtboldan birinshi lıgada aqtaýlyq «Kaspıı» alty týr boıy jeńiske jete almaı keledi.

Aqtaýlyq komanda birinshilikti sátti bastaǵan edi. Birneshe týr boıy kósh basynda turdy.

Alaıda sońǵy týrlarda jeńistiń kiltin taba almaı júr. 

Sonyń saldarynan týrnır kestesinde segizinshi oryndy mise tutýǵa májbúr bolyp otyr. 

Aqtaýlyq komanda on toǵyzynshy týrda syrt alańda «Túrkistan» klýbymen kezdesti. Oıyn barysynda komandalar 2:2 esebine qanaǵat bildirdi. 

Sondaı-aq atalǵan týrda Túrkistan oblysynyń «Jetisaıy» óz alańynda Batys Qazaqstan oblysynyń «Aqjaıyǵyn» 3:0 esebimen súrindirdi.

Nátıjesinde týrnır kestesinde ekinshi orynǵa kóterildi.

Atalǵan týrda «Ulytaý» «Aqtóbe-2» komandasyn 6:0 esebimen jeńse, «Taraz» «Arysty» 3:0 esebimen tize búktirdi.

Endi 9 tamyzda «Qaısar-Jas» pen «SD Family», «Han Táńiri» men «Oqjetpes», «Ekibastuz» ben «Qaırat-Jastar» kezdesedi.

Eske salsaq, budan buryn Konferentsııa lıgasynda «Ordabasy» alǵashqy kezdesýinde «Pıýnıkten» jeńildi.