Fýtboldan Birinshi lıgada «Ertis» qarsylasyn iri eseppen jeńdi

ASTANA. KAZINFORM - Fýtboldan Birinshi lıga komandalary arasyndaǵy Qazaqstan chempıonatynyń 10-týrynyń alǵashqy oıyn kúni máresine jetti.

Atalǵan týrda pavlodarlyq «Ertis» syrt alańda «Túrkistan» komandasyn 7:1 esebimen jeńdi. Nátıjesinde týrnır kestesinde 20 upaımen ekinshi orynǵa kóterildi. 

Sondaı-aq shymkenttik «Akademııa Ońtústik» óz alańynda almatylyq «Qaırat-2» klýbyna 3:5, astanalyq «SD Family» Almatynyń «Han táńirine» 0:3 esebimen jol berdi.

Endi 20 maýsymda «Altaı» (Óskemen) men AKAS (Almaty), «Jetisaı» (Túrkistan oblysy) men «Shahter» (Qaraǵandy), «Kaspıı» (Aqtaý) men «Ekibastuz» (Pavlodar oblysy), «Taraz» ben «Aqtóbe-2» jasyl alańǵa shyǵady.

Týrnır kestesinde alǵashqy eki orynǵa ıe bolǵan komandalar aldaǵy jyly Premer-lıgaǵa qatysýǵa tikeleı joldamaǵa qol jetkizedi.

Bıyl «Shahter», «Ertis», «Kaspıı» komandalary úzdikter qatarynda bolady dep boljanyp otyr.

Eske salsaq, budan buryn qazaqstandyq klýbtardyń Konferentsııa lıgasyndaǵy yqtımal qarsylastary anyqtaldy.