Birinshi lıga: «Ertis» fýtbol komandasy birinshi orynǵa kóterildi

ASTANA. KAZINFORM - Búgin fýtboldan Birinshi lıganyń HIH týrynyń alǵashqy oıyn kúni ótti.

Atalǵan týr oıyndary 21-22 tamyz kúnderine belgilengen.

Búgin, 21 tamyzda Pavlodardyń «Ertisi» syrt alańda Shymkenttiń «Akademııa Ońtústik» klýbyn 1:0 esebimen súrindirdi. Nátıjesinde 45 upaımen týrnır kestesinde birinshi orynǵa kóterildi.

Sondaı-aq almatylyq AKAS óz alańynda «Aqtóbe-2» klýbyn 4:0 esebimen jeńdi.

Al «Altaı» (Óskemen) men «Túrkistan» kezdesýi ótkizilgen joq. Kezdesýge túrkistandyq klýb kelmeı qalǵan.

Qazaqstan fýtbol federatsııasynyń habarlaýynsha, atalǵan matchqa qatysty sheshim federatsııanyń baqylaý-tártiptik komıtetiniń aldaǵy otyrysynda qabyldanady.

Endi 22 tamyzda «Jetisaı» (Túrkistan oblysy) men «Ekibastuz» (Pavlodar oblysy), «Shahter» (Qaraǵandy) men «Qaırat-2» (Almaty), «Kaspıı» (Aqtaý) men «SD Family» (Astana), «Taraz» ben «Han táńiri» (Almaty) oınaıdy.

Týrnır kestesinde alǵashqy eki orynǵa ıe bolǵan komandalar aldaǵy jyly Premer-lıgaǵa qatysýǵa tikeleı joldamaǵa qol jetkizedi.

Bıyl «Shahter», «Ertis», «Kaspıı» komandalary úzdikter qatarynda bolady dep boljanyp otyr.

On toǵyz týrdan keıin «Kaspıı», «Ertis», «Shahter», «Altaı» komandalary alǵashqy oryndardy ózara bólisip tur.