Fýtboldan Birinshi lıgada «Altaı» «Kaspııdi» iri eseppen jeńdi

ASTANA. KAZINFORM - Búgin fýtboldan Birinshi lıgada 17-týrynyń alǵashqy oıyn kúni máresine jetti.

Búgin, 7 tamyzda atalǵan týrdaǵy úsh kezdesý ótkizildi. Olardyń arasynda «Altaı» (Óskemen) men «Kaspıı» (Aqtaý) kezdesýi jankúıer qyzyǵýshylyǵyn týǵyzdy. Eki komanda týrnır kestesinde birinshi jáne ekinshi oryndy ózara bólisip keledi. Sondyqtan oıynnyń tartysty ótetini anyq edi.

Bul oıynda óskemendik fýtbolshylar alǵashqy mınýttan tizgindi óz qolynda ustaýǵa tyrysty.

Nátıjesinde olar birinshi kezeńde qarsylas qaqpasyna jaýapsyz úsh gol soqty. Oıynnyń 2-mınýtynda Ibragım Dadaev esep ashsa, odan keıin Ádilet Omarbek 6-mınýtta esepti ústemeleı tústi. 

Al Ibragım Dadaev 38, 47-mınýtta taǵy eki márte kózge tússe, Artem Teterın 79-mınýtta mergendik tanytty. Oǵan «Kaspıı» sapynan Mıras Turlybek 57-mınýtta bir golmen jaýap qaıyrdy. 

Osylaısha «Altaı» qarsylasynan 5:1 esebimen basym túsip, týrnır kestesinde 38 upaımen ekinshi orynǵa kóterildi.

Sondaı-aq atalǵan týrda shymkenttik «Akademııa Ońtústik» elordalyq «SD Family» komandasyn 5:2 esebimen jeńse, «Qaırat-2» (Almaty) men «Aqtóbe-2» komandalary 2:2 esebine qanaǵat bildirdi.

Endi atalǵan týrda 8 tamyzda «Jetisaı» (Túrkistan oblysy) men «Han táńiri» (Almaty), «Shahter» (Qaraǵandy) men «Ekibastuz» (Pavlodar oblysy), AKAS (Almaty) men «Ertis» (Pavlodar), «Taraz» ben «Túrkistan» oınaıdy.

Eske salsaq, búgin elordalyq «Astana» UEFA Konferentsııa lıgasy úshinshi irikteý kezeńinde syrt alańda Shveıtsarııanyń «Lozanna» komandasymen kezdesedi.