Fýtboldan Brazılııada ótetin álem birinshiligin teletranslıatsııalaý saqtandyrylatyn bolady
ALMATY. QazAqparat - Bıyl fýtboldan Brazılııada ótetin álem birinshiligin teletranslıatsııalaý sharasy saqtandyrylatyn bolady. Bul týraly búgin «Eýrazııa» Saqtandyrý kompanııasy» AQ baspasóz qyzmeti habarlady.
Bul jerde Sony korporatsııasy Brazılııada ótetin álem birinshiligi ótpeı qalǵan jaǵdaıda kóretin óziniń shyǵyndaryn 1 mlrd. úndi rýpııine baǵalady. Al bul dollarǵa shaqqanda 17 mıllıonnan astam AQSh dollaryn quraıdy.
Óıtkeni, Sony korporatsııasy bul birinshilikti Ońtústik Azııa, sonyń ishinde Úndistan, Bangladesh, Býtan, Nepal, Pákistan, Maldıv araldary jáne Shrı-Lanka jerinde teletranslıatsııalaý quqyǵyna ıe boldy, delingen habarlamada.
Sondyqtan, atalmysh fýtbol merekesiniń resmı telehabar taratýshysy retinde Sony álem birinshiligi ótpeı qalǵan jaǵdaıda nemese tikeleı efır barysynda (bólek match nemese búkil týrnır) tehnıkalyq aqaý oryn alǵan jaǵdaıda, oıyn barysynda kórsetiletin jarnamalardan alatyn kirisin saqtandyrýdy kózdep otyr.
Bul jerde saqtandyrý kelisimi boıynsha azamattyq tolqýlar, búlikter, kóterilister, qasaqana zalal keltirý áreketteri, saıası saryndaǵy tártipsizdikter, lańkestik áreketter (shyn nemese múmkin bolar qaýip-qaterler) jáne tikeleı efır barysynda kez kelgen sebep boıynsha oryn alatyn máseleler saqtandyrý jaǵdaıy bolyp sanalady.
«Eýrazııa» Saqtandyrý kompanııasy» AQ qazir osy álemdegi eń iri habar taratýshy arnalardyń biri - Sony korporatsııasyn qaıta saqtandyrý sharasyna qatysý múmkindigin qarastyrýda.
Sony Entertainment telearnasy jarnamalyq rolıkterdi óziniń: Sony Entertainment Television, SET Max, SAB TV, SET PIX, Sony MIX, Sony SIX, AXN, Animax jáne basqa da HD jelilik arnalarynda kórsetetini belgili.
Esterińizge sala keteıik, bıyl fýtboldan álem birinshiligi 12 maýsym men 13 shilde aralyǵynda Brazılııa memleketinde ótedi. Onda barlyǵy 64 match oınalady.
