Fýtboldan Birinshi lıganyń jeńimpazy Premer-lıgadaǵy jańa maýsymda alǵashqy altylyqtyń qatarynan oryn alýdy josparlaýda
ALMATY. 4 qańtar. QazAqparat /Erlik Erjanuly/ - Premer-lıga debıýtanty Qaskeleńniń «Suńqar» fýtbol klýby HHІ Qazaqstan chempıonatynda úzdik altylyqtan oryn alýdy mejelep otyr.
2004 jyly negizi qalanǵan Almaty oblysy Qarasaı aýdanynyń bul komandasy 2009 jylǵa deıin «Qarasaı sarbazdary» dep atalǵan bolatyn. 2010 jyly ataýyn «Suńqar» dep ózgertken olar 2007-2011 jyldary Birinshi lıgada óner kórsetip kelgen bolatyn. 2009 jyly 4-oryn alǵan olar, 2010 jyly qola júldeger atandy. Al ótken maýsymda Premer-lıgaǵa shyǵýdy aldaryna basty maqsat etip qoıǵan olar bul mindetti de oryndap shyqty. 10 jeltoqsanda Almatyda alǵashqy oqý-jattyǵý bastaǵan qaskeleńdik aıaqdopshylardy Premer-Lıgadaǵy jańa maýsymǵa Dmıtrıı Ogaı ázirleýde. Endi komandanyń Túrkııada bolatyn shet eldegi alǵashqy oqý-jattyǵý jıynynda bas bapkerge Ashat Qadyrqulov, Almaz Qulshynbaev pen Konstantın Gorovenko kómektespek.
Jalpy Qazaqstan fýtbol federatsııasy atqarý komıtetiniń 24 jeltoqsandaǵy sheshimimen bıyl Premer-lıgadaǵy komandalar sany 12-den 14-ke deıin ulǵaıǵan bolatyn. Olar - «Shahter» (Qaraǵandy). «Jetisý» (Taldyqorǵan), «Aqtóbe» (Aqtóbe), «Astana» (Astana), «Ertis» (Pavlodar), «Ordabasy» (Shymkent), «Tobyl» (Qostanaı), «Qaısar» (Qyzylorda), «Taraz» (Taraz), «Atyraý» (Atyraý), «Suńqar» (Qaskeleń), «Oqjetpes» (Kókshetaý), «Qaırat» (Almaty) jáne «Aqjaıyq (Oral).
Al chempıonat jalaýy 11 naýryzda kóterilmek.
