Fýtboldan birinshi lıgada «Oqjetpes» pen «Qaısar» teń tústi
NUR-SULTAN. QazAqparat - Fýtboldan birinshi lıga komandalary arasyndaǵy el birinshiliginiń 18-týry máresine jetti, dep habarlaıdy QazAqparat tilshisi.
Atalǵan týrdaǵy basty oıyn Kókshetaýdyń «Oqjetpes» jáne Qyzylordanyń «Qaısar» komandalary arasynda ótti.
Eki komanda týrnır kestesinde alǵashqy eki oryndy ózara bólisip tur. Kókshetaýlyq klýb úsh upaımen alda kele jatqan bolatyn. Sondyqtan «Qaısar» jeńiske jetken jaǵdaıda upaı sany teńesetin edi.
Oıynnyń 33-mınýtynda qyzylordalyq klýbtan Adama Dıallo esep ashty. Bul esep kezdesýdiń 92-mınýtyna deıin saqtalyp turdy. Sol ýaqytta buryshtamadan áýelete berilgen dopty «Oqjetpes» qaqpashysy Aleksandr Dovgal qarsylas komanda qaqpasyna saldy.
Osylaısha kezdesý 1:1 esebimen teń aıaqtaldy. Eki komanda da týrnır kestesindegi ornyn saqtap qaldy.
Atalǵan týrdaǵy ózge oıyn nátıjeleri tómendegishe:
«Baıqońyr» (Qyzylorda) - «Igilik» (Jambyl oblysy) 1:2
«Ekibastuz» (Pavlodar oblysy) - «Jeńis» (Nur-Sultan) 3:2
«Qaırat-Jastar» (Almaty) - «Jetisý» (Taldyqorǵan) 2:3
«Taraz-Qarataý» (Jambyl oblysy) - «Akademııa Ońtústik» (Shymkent) 4:0
«Qyran» (Shymkent) - «ıAssy» (Túrkistan) 2:2
«Astana jastar» (Nur-Sultan) - «Shahter-Bolat» (Qaraǵandy) 3:4
Endi 19 týr oıyndary 10 jáne 11 qyrkúıek kúnderi ótedi.
Eske salsaq, budan buryn fýtboldan Qazaqstan kýbogynyń 1/2 fınalyna shyqqan sońǵy komanda anyqtaldy.
