Fýtboldan birinshi lıgada «Qaısar» jeńiske jetti
ASTANA. QazAqparat – Fýtboldan birinshi lıga komandalary arasyndaǵy el birinshiliginiń keıinge qaldyrylǵan 15-týrynyń eki oıyny ótkizildi, dep habarlaıdy QazAqparat tilshisi.
Atalǵan týrda kósh basynda kele jatqan Kókshetaýdyń «Oqjetpesi» syrt alańda Taldyqorǵanda «Jetisýmen» júzdesti. Komandalar bıyl Premer-lıgaǵa joldamaǵa úmitker ujymdar sanalady. Sondyqtan atalǵan kezdesý tartysty ótti. Oıyn barysynda kókshetaýlyq klýbtan Jasulan Moldaqaraev 3-mınýtta esep ashsa, oǵan 32-mınýtta taldyqorǵandyq Baýyrjan Turysbek bir golmen jaýap qaıyrdy.
Osylaısha komandalar 1:1 esebine qanaǵat bildirdi.
Taǵy bir kezdesýde Qyzylordanyń «Qaısary» syrt alańda Jambyl oblysynyń «Igilik» klýbyn 4:0 esebimen tas-talqan etti. Oıyn barysynda qyzylordalyq klýbtan Kırıll Sıdorenko 51-mınýtta penaltıden esep ashsa, odan keıin Adam Dıallo 63-mınýtta esepti ústemeleı tústi. Al 82-mınýtta Eljas Altynbekov mergendik tanytsa, 89-mınýtta Elıseı Gorshýnov qorytyndy esepti belgiledi.
Endi 22-týr oıyndary 9 qazan kúni ótedi.
Eske salsaq, budan buryn fýtboldan birinshi lıga komandalary arasyndaǵy el birinshiliginiń 21-týry máresine jetti.
Foto: fckaysar.kz
