Fýtboldan birinshi lıgada «Qaısar» qatarynan besinshi ret jeńiske jetti
QYZYLORDA. QazAqparat - Fýtboldan birinshi lıga komandalary arasyndaǵy el birinshiliginiń 24-týryndaǵy alǵashqy oıyn kúni ótti, dep habarlaıdy QazAqparat tilshisi.
Týrnır kestesinde ekinshi orynda kele jatqan «Qaısar» elordalyq «Jeńis» komandasymen kezdesti.
Qyzylordalyq klýb bıyl Premer-lıgaǵa qaıta oralýdy kózdeıdi. Sondyqtan árbir oıynda jeńiske jetýdiń jolyn izdep keledi. Budan buryn qatarynan tórt márte qarsylastaryn qapy qaldyrǵan qyzylordalyq komanda kezdesý basynan tizgindi óz qolyna alýǵa kúsh saldy.
Nátıjesinde birinshi kezeńniń 13-mınýtta «Qaısar» shabýylshysy Adama Dıallo esep ashsa, 19-mınýtta basymdyqty arttyra tústi.
Osylaısha «Qaısar» qarsylasynan 2:0 esebimen basym tústi.
Qyzylordalyq klýb endigi oıynyn 28 qazanda óz alańynda Taldyqorǵannyń «Jetisý» komandasyna qarsy ótkizedi.
Sondaı-aq búgin «Akademııa Ońtústik» óz alańynda Jambyl oblysynyń «Igiligine» 1:4 esebimen jol berdi.
Atalǵan týrdaǵy qalǵan oıyndar 22 qazan kúni ótkiziledi.
