Fýtboldan birinshi lıgada «Elimaı» týrnır kestesindegi jaǵdaıyn jaqsartty

ASTANA. QazAqparat – Fýtboldan birinshi lıga komandalary arasynda el chempıonatynyń 20-týrynda Semeıdiń «Elimaıy» «Túrkistandy» jeńip, týrnır kestesindegi jaǵdaıyn jaqsarta tústi, dep habarlaıdy QazAqparat tilshisi.

Semeılik klýb bıyl Premer-lıgaǵa oralýdy aldyna maqsat etip otyr. Árbir týrda qarsylastaryn qapy qaldyryp, úsh upaıdy enshilep keledi.

Komanda 20-týrda syrt alańda «Túrkistandy» 2:1 esebimen súrindirdi. Nátıjesinde týrnır kestesinde ókshelep kele jatqan túrkistandyq «Turandy» jeti upaıǵa artqa qaldyryp otyr.

Atalǵan týrdaǵy ózge oıyndarda 18 tamyzda «Astana-2» «Qyrandy» 2:1, «Qaırat-2» «Arysty» 5:1 esebimen tize búktirdi.

Al 17 tamyzda «Taraz» «Han táńirin» 2:1, «Turan» «Ekibastuzdy» 6:1 esebimen jeńse, «Aqjaıyq» «Ońtústik akademııasyna» 1:2, «Jas Qyran» «Jeńiske» 0:1 esebimen ese jiberdi.

Endi 21-týr oıyndary 24 jáne 25 tamyz kúnderi ótkiziledi.

Eske salsaq, budan buryn qazaqstandyq fýtbolshy Bahtııar Zaınýtdınov Túrkııanyń «Beshıktash» klýbyna aýysty.