Fýtboldan birinshi lıgada «Elimaı» «Turannan» jeti upaıǵa uzap ketti

ASTANA. QazAqparat – Fýtboldan birinshi lıga komandalary arasynda el chempıonatynyń 19-týrynda Semeıdiń «Elimaıy» túrkistandyq «Turandy» jeńip, týrnır kestesinde atalǵan qarsylasynan jeti upaıǵa uzap ketti, dep habarlaıdy QazAqparat tilshisi.

Týrnır kestesinde komandalar qatarlas turǵan edi. Jeńiske jetken jaǵdaıda «Turan» «Elimaıdy» qýyp jetetin. Túrkistandyq klýbtyń basty qarsylasynan bir oıyny kem bolatyn.

Eki komanda kezdesýi asa tartysty ótti. Oıyn taǵdyryn sheshken jalǵyz goldy «Elimaı» fýtbolshysy Arman Smaıylov 85-mınýtta soqty.

Osylaısha semeılik klýb qarsylasynan 1:0 esebimen basym túsip, týrnır kestesindegi jaǵdaıyn jaqsartyp aldy. Qazir atalǵan komanda enshisinde 18 oıynnan keıin 50 upaı bar. Al «Turan» 17 oıynnan 43 upaı jınap, ekinshi orynda tur.

Atalǵan týrda «Ońtústik akademııasy» «Qaırat-2» komandasyna 2:3, «Aqtóbe-2» «Túrkistanǵa» 1:2, «Han táńiri» «Jas qyranǵa» 0:1 esebimen jeńilip qaldy.

Al óz alańynda «Ekibastuz» «Tarazdy» 5:3, «Qyran» «Aqjaıyqty» 3:1, «Jeńis» «Astana-2» komandasyn 2:0 esebimen tize búktirdi.

Endi 20-týr oıyndary 17 jáne 18 tamyz kúnderi ótkiziledi.

Eske salsaq, budan buryn Konferentsııa lıgasynda «Aqtóbe» syrt alańda «Sepsı» komandasymen teń tústi.