Fýtboldan birinshi lıgada «Elimaı» qatarynan altynshy márte jeńiske jetti
ASTANA. QazAqparat - Búgin fýtboldan birinshi lıga komandalary arasyndaǵy el birinshiliginiń 7-týry máresine jetti, dep habarlaıdy QazAqparat tilshisi.
Týrnır kestesinde kósh basynda kele jatqan Semeıdiń «Elimaı» komandasy bul joly da súringen joq. Syrt alańda «Aqtóbe jastardy» 5:0 esebimen súrindirdi. Osylaısha qatarynan altynshy márte jeńiske jetti. Nátıjesinde týrnır kestesinde ekinshi orynda kele jatqan elordalyq «Jeńis» klýbynan tórt upaıǵa alda keledi. «Jeńis» klýby syrt alańda «Tarazdy» 4:0 esebimen tize búktirip, jaǵdaıyn jaqsarta tústi.
Túrkistan oblysynyń «Arys» klýby jankúıerlerdi tańǵaldyryp tur. Qazir úshinshi orynda kele jatqan komanda syrt alańda Oraldyń «Aqjaıyǵyn» 1:0 esebimen qapy qaldyrdy.
Atalǵan týrdaǵy ózge oıyn nátıjeleri tómendegishe: «Astana-2» - «Ońtústik akademııasy» 0:3, «Turan» (Túrkistan) - «Han táńiri» (Almaty) 1:0, «Jas Qyran» (Almaty) - «Qyran» (Shymkent) 4:2, «Túrkistan» - «Ekibastuz» 4:3.
Endi 8-týr oıyndary 19 mamyr kúni ótkiziledi.
Eske salsaq, budan buryn fýtboldan Premer-lıga komandalary arasyndaǵy el birinshiliginiń 9-týry máresine jetti.
