Fýtboldan birinshi lıgada baq synaıtyn komandalar anyqtaldy
NUR-SULTAN. QazAqparat - Bıyl fýtboldan birinshi lıgada baq synaıtyn 10 komanda anyqtaldy. Al 4 komanda sertıfıkattaý qaǵıdasyna sáıkes talaptardy oryndaýy tıis, dep habarlaıdy QazAqparat tilshisi.
Qazaqstan fýtbol federatsııasy attestattaý komıssııasynyń otyrysynda 10 komandanyń birinshilikke qatysýyna ruqsat berildi.
Olardyń qatarynda «Qaısar» (Qyzylorda), «Jetisý» (Taldyqorǵan), «Oqjetpes» (Kókshetaý), «Astana J» (Nur-Sultan), «Jeńis» (Nur-Sultan), «Qaırat-Jastar» (Almaty), «Taraz-Qarataý» (Taraz), «Ońtústik akademııasy» (Shymkent), «Shahter-Bolat» (Qaraǵandy) jáne «ıAssy» (Túrkistan) komandalary bar.
Al «Baıqońyr» (Qyzylorda), «Ekibastuz» (Pavlodar oblysy), «Igilik» (Jambyl oblysy) jáne «Qyran» (Shymkent) klýbtaryna sertıfıkattaý qaǵıdasynda belgilengen talaptardyń oryndalýyn rastaıtyn qajetti qujattardy sáıkestendirý qajet.
Ony usyný úshin 2022 jyldyń 21 naýryzyna deıin ýaqyt berildi.
Eske salsaq, fýtboldan Qazaqstan birinshiliginde «Tobyl» Aqtaýda «Kaspıı» komandasymen teń tústi.
