Fýtboldan Azııa kýbogy fınalyna shyqqan eki qurama anyqtaldy

DOHA. KAZINFORM - Katarda ótip jatqan fýtboldan Azııa kýbogy fınalyna shyqqan eki qurama belgili boldy.

6 aqpanda jartylaı fınalda Iordanııa men Ońtústik Koreıa quramalary kezdesti. Iordanııa fýtbolshylary qurlyqtyq dodaǵa bıyl besinshi márte qatysyp otyr. Alǵash ret 2004 jyly dop dodasynda baq synaǵan olar ázirge eshqandaı jetistikke jetken joq edi.

2004, 2011 jyldarda shırek, 2019 jyly 1/8 fınalǵa shyqsa, 2015 jyly toptyq kezeńnen asa alǵan joq. Bıylǵy dodada toptyq kezeńde Malaızııany (4:0) jeńse, Ońtústik Koreıamen (2:2) teń túsip, Bahreınge (0:1) ese jiberdi.

Odan keıingi kezeńde Irakty (3:2), Tájikstandy (1:0) súrindirip, jartylaı fınalda Ońtústik Koreıany (2:0) orta jolda qaldyryp ketti. Taǵy bir jartylaı fınalda Qatar men Iran quramalary sheberlik baıqasty.

Kezdesý barysynda ırandyq Serdar Azmýn 3-mınýtta esep ashsa, odan keıin qatarlyq Djassem Abýlsallam 17, Akram Afıf 43-mınýtta mergendik tanytty. Al 53-mınýtta ırandyq Alıreza Djahanbaksh penaltıden tarazy basyn teńestirse, Almoez Alı 82-mınýtta Qatardy alǵa shyǵardy.

Osylaısha Katar qarsylasynan 3:2 esebimen basym túsip, fınalǵa joldama aldy. Olar 2019 jyly Azııa chempıony ataǵyn jeńip alǵan edi. Fınal 10 aqpanda Lýsaıl qalasyndaǵy «Lýsaıl» stadıonynda ótkiziledi.

Azııa kýbogy oıyndary 1956 jyldan beri turaqty túrde ótkizilip keledi.

Qazirge deıin Japonııa - 4, Saýd Arabııasy men Iran - 3, Ońtústik Koreıa - 2, Izraıl, Kýveıt, Avstralııa, Irak, Katar 1 retten chempıon atandy.