Fýtboldan áıelder Ulttyq quramasy jankúıerlermen kezdesti
PAVLODAR. QazAqparat - Jeksenbi, 2 qyrkúıek kúni Pavlodar qalasyndaǵy «Batyr Mall» saýda, oıyn-saýyq ortalyǵynda fýtboldan Qazaqstan áıelder quramasy jankúıerlermen kezdesti. Bul týraly QR Fýtbol federatsııasynan málim etti, dep habarlaıdy QazAqparat.
Pavlodar qalasynyń turǵyndary men jankúıerlermen kezdesýge Ulttyq quramanyń kapıtany Begaıym Qyrǵyzbaeva, qaqpashy Oksana Jeleznıak jáne jartylaı qorǵaýshy Karına Jumabaıqyzy keldi. Fýtbolshy qyzdar suraqtarǵa jaýap berip, eń qyzyqty degen saýaldarǵa syılyqtaryn tartý etti. Sondaı-aq olar qoltańbalaryn taratty.
Sportsúıer qaýym úshin mundaı sharany alǵash ret Pavlodar oblysynyń Fýtbol federatsııasy QR Fýtbol federatsııasymen birlesip uıymdastyrdy.
Eske salaıyq, 4 qyrkúıek kúni Pavlodardyń Ortalyq stadıonynda áıelder arasynda 2019 jylǵy Álem chempıonatynyń irikteý kezeńiniń sońǵy matchy ótedi.
Bul oıynǵa bolgarııalyq mamandar tórelik etetinin buǵan deıin habarlaǵan bolatynbyz.
