Fýtboldan áıelder arasyndaǵy Qazaqstan chempıonatynda «Aqtóbe» óziniń rekordyn jańartty

ASTANA. KAZINFORM - Fýtboldan áıelder arasyndaǵy Qazaqstan chempıonatynyń toǵyzynshy týrynda «Aqtóbe» komandasy qarsylas qaqpasyna gol soǵý jóninen óziniń rekordyn jańartty.

Aqtóbelik fýtbolshylar syrt alańda Kókshetaýdyń «Oqjetpes» komandasymen oınady. Kezdesý barysynda olar birinshi kezeńde qarsylas qaqpasyna jaýapsyz on eki gol soqsa, ekinshi kezeńde de dál sondaı kórsetkishti qaıtalady.

Osylaısha «Aqtóbe» qarsylasynan 24:0 esebimen basym tústi. Olar buǵan deıin 19 mamyrda «Atyraýdy» 19:0 esebimen tize búktirgen edi.

Toǵyzynshy týrdyń oıyn kestesi:

«Atyraý» - «Qyzyljar» (Petropavl) 1:6

«Oqjetpes» (Kókshetaý) - «Aqtóbe» 0:24

«Jetisý» (Taldyqorǵan) - «Ulytaý» (Jezqazǵan) 0:2

«Tobyl» (Qostanaı) - «Elimaı» (Semeı) 0:4

«Tomırıs-Turan» (Túrkistan) - «Qaırat» (Almaty) 3:0

«Jeńis» (Astana) - «Astana» 0:3

«Qaısar» (Qyzylorda) - BIIK (Shymkent) 0:7

Bıyl Qazaqstan fýtbol federatsııasy talabymen erler klýbtarynyń janynan áıelder quramalary qurylǵan. Ótken jyly chempıonatqa tek 4 óńirden 5 komanda ǵana tirkelgen edi.

Ár komanda sapynda keminde qazaqstandyq fýtbol mektebiniń 13 túlegi bolýǵa tıis degen talap qoıylyp otyr. Oǵan 2009 jyly jáne odan erte dúnıege kelgen fýtbolshylar qatysa alady.