Fýtboldan álem chempıonatynyń fınaldyq satysyna taǵy 7 qurama shyqty

Bes joldama ıegeri 29 naýryzda Afrıka qurlyǵynda belgili boldy. Іrikteý satysynyń úshinshi kezeńindegi qarymta oıynda Kamerýn Aljırdi 2:1 (birinshi oıyn 0:1), Marokko Kongo Demokratııalyq Respýblıkasyn 4:1 (birinshi oıyn 1:1) jeńdi. Al Týnıs pen Malı 0:0 (birinshi oıyn 1:0), Nıgerııa men Gana 1:1 (birinshi oıyn 0:0) esebimen teń tústi. Senegal men Egıpet eki oıynda bir-birin 1:0 esebimen jeńip, penaltıden senegaldyqtar 3:1 esebimen basym tústi.

Osylaısha Katarda ótetin dodaǵa Afrıkadan Kamerýn, Marokko, Týnıs, Gana, Senegal quramalary joldama aldy.

Taǵy eki joldama Eýropa qurlyǵynda berildi. Álem chempınaty ótpeli saıysynda Portýgalııa Soltústik Makedonııany, Polsha Shvetsııany 2:0 esebimen súrindirip, dúbirli dodaǵa qatysaty quramalar qataryna qosyldy.

Eýropa qurlyǵynda álem chempınaty ótpeli saıysynda bir oıynmen Shotlandııa men Ýkraına jeńimpazy anyqtalady. Kezdesý shamamen maýsym aıyna belgilengen. Jeńimpazy sol aıda Ýelspen taǵy bir joldamany sarapqa salady.

Endi 30 naýryzda Soltústik Amerıka qurlyǵynan taǵy eki qurama ıegeri anyqtalady. Mundaı múmkindikke AQSh, Meksıka jáne Kosta-Rıka úmitker bolyp otyr. Ázirge atalǵan qurlyqtan Kanada ǵana úzdikter qataryna qosylyp úlgerdi.

Odan keıin Ońtústik Amerıka, Azııa, Soltústik Amerıka jáne muhıt aımaǵynan tórt qurama qurlyqaralyq ótpeli saıysta taǵy eki joldamaǵa talasady.

Eske salsaq, buǵan deıin oǵan 20 qurama joldama alyp úlgergen edi. Olardyń qatarynda alań ıesi – Katar, Eýropa elderinen – Germanııa, Danııa, Frantsııa, Belgııa, Horvatııa, Ispanııa, Serbııa, Anglııa, Shveıtsarııa, Nıderlandy, Ońtústik Amerıkadan – Brazılııa, Argentına, Ýrýgvaı, Ekvador, Soltústik Amerıkadan – Kanada, Azııa memleketterinen – Iran, Ońtústik Koreıa, Japonııa, Saýd Arabııasy quramalary shyqqan bolatyn.

Álem chempıonatynyń fınaldyq satysynyń jerebesi 1 sáýirde Katar astanasy – Doha qalasynda ótedi.

Dúbirli doda bıylǵy jyldyń 21 qarashasy men 8 jeltoqsany aralyǵynda Katarda bolady.