Fýtboldan álem chempıonatynyń aqtyq básekeleri elorda kóshesinde ornatylǵan dıspleıden kórsetiledi
ASTANA. Shildeniń 7-si. QazAqparat - Shildeniń 10-11-i kúnderi Ońtústik Afrıka Respýblıkasynda ótip jatqan fýtboldan álem chempıonatynyń aqtyq básekeleri elorda kóshesinde ornatylǵan dıspleıden tikeleı kórsetiledi.
Bul aqparatty «Báıterek» halyqaralyq medıa ortalyǵy taratyp otyr.
«Astana qalasynyń ákimdigi Ońtústik Afrıka Respýblıkasynyń elshiligi, «Habar» agenttigi jáne «BI Media Company» kompanııasynyń qatysýmen fýtboldan álem chempıonaty-2010 matchynyń tikeleı kórsetilimine barsha qaýymdy shaqyrady», delingen baspasóz habarlamasynda.
Sonymen shildeniń 10-y kúni kóshe dıspleıinde qola júlde úshin tartysty oıyn kórsetilimi uıymdastyrylsa, shildeniń 11-i kúni fınaldyq kezdesý men jabylý rásimi tikeleı efırde taratylady. Tikeleı efır Báıterek («Regine's» meıramhanasynyń mańy) aýdanynda ornalasqan LED-dıspleıden kórsetiledi. Taratylý ýaqyty - saǵat 00.30. Fýtboldan álem chempıonaty tikeleı efırden taratylatyn kúni kóshpeli saýda uıymdastyrylady.
