Fýtboldan Álem chempıonatyn úzdik júrgizgen sport kommentatorlary anyqtaldy
ASTANA. QazAqparat - Fýtboldan Reseıde ótken Álem chempıonatyn júrgizgen 15 sport kommentatorynyń ishindegi úzdikteri anyqtaldy. Úzdikterdi OKQ-da ótken baspasóz máslıhatynda «Qazsport» telearnasynyń dırektory Pavel Tsybýlın atady, dep habarlaıdy QazAqparat tilshisi.
Baspasóz máslıhatynda «Qazaqstan» teleradıokorporatsııasynyń Basqarma tóraǵasy Erlan Qarın búgin tańerteń FIFA-nyń uıymdastyrý komıtetinen fýtboldan Álem chempıonatyn joǵary deńgeıde kórsetilimin qamtamasyz etkeni úshin teleradıokorporatsııaǵa alǵys hat kelgendigin aıtty.
«Bir aı boıy áleýmettik jeliler nemese basqa da quraldar arqyly kórermenderimiz tarapynan kúnige alǵys hattar kelip túsýde. Ásirese, kommentatorlardyń jumysyn bólip atap jatyr. Álemdik fýtbol týraly aıtpaǵanda, bizdiń televızııa úshin, bizdiń sporttyq jýrnalıstıka úshin bul da bir betburysty oqıǵa boldy. Sebebi, bizdiń aýdıtorııa ózimizdiń telearnalarǵa, sport kommentatorlaryna kóńil buryp, eńbekterin baǵalap jatyr», - deıdi ol.
Erlan Qarın óz sózinde bir aı boıy fýtbol oıynyn júrgizip kelgen sport komentatorlaryna alǵysyn bildirdi.
«Barlyq áleýmettik jelilerde arnaıy baıqaý uıymdastyryp, bizdiń kommentatorlardyń jumysyn qalaı baǵalaıtynyn bilgimiz keldi. Qaı sport kommentatory úzdik dep ataısyzdar dep baıqaý jarııalaǵan edik. Baıqaýǵa usynystar áli de túsip jatyr. Biraq, birden bizdiń de, jankúıerlerdiń de bergen baǵasy boıynsha oıymyz bir jerden shyǵyp otyr», - deıdi Erlan Qarın.
Belgili bolǵandaı, fýtboldan Álem chempıonatyn qazaq jáne orys tilinde 15 sport kommentatory júrgizgen. Baıqaý áleýmettik jelilerde korporatsııanyń barlyq akkaýntarynda jarııalanǵan.
Erlan Qarınniń aıtýynsha, sport kommentatorlarynyń júrgizýinde asa úlken qatelikter bolmaǵan.
«Chempıonatty júrgizgen áriptestermen kelisip, olardy baqylap, kórermenderdiń reaktsııasyn baqylap otyratynymyzdy eskerttik. Sodan keıin áleýmettik jelige shyqtyq», - deıdi ol.
Osydan keıin «Qazsport» telearnasynyń dırektory Pavel Tsybýlın áleýmettiń baǵasy boıynsha anyqtalǵan úzdik sport kommentatorlardy atady. Olar - Ermuhamed Máýlen men Eseı Jeńisuly, Sergeı Raılıan jáne Tımýr Súleımenov.
Erlan Qarınniń aıtýyna qaraǵanda, úzdik atanǵandarǵa aqshalaı syıaqy beriledi.
Eske sala ketsek, fýtboldan Álem chempıonatynyń fınalynda Frantsııa men Horvatııa quramalary kezdesip, Frantsııa jeńiske jetken bolatyn.
