Fýtboldan Álem chempıonaty: Ýrýgvaı Reseıdi iri eseppen jeńdi
ASTANA. QazAqparat - Fýtboldan álem birinshiligi aıasynda toptyq kezeńdegi A tobynda Ýrýgvaı men Reseı quramalary kezdesti. Bul oıynda Ýrýgvaı basymdyq tanytyp, alań ıelerin 3:0 esebimen jeńdi, dep habarlaıdy QazAqparat tilshisi.
Qos qurama da alǵashqy eki týrda jeńiske jetken edi. Ýrýgvaı qos kezdesýde de jalǵyz goldan engizdi. Aldymen Egıpetti, sodan keıin Saýd Arabııasyn 1:0 esebimen tize búktirdi. Al Reseı Saýd Arabııasyn 5:0, Egıpetti 3:1 esebimen jeńip, ózderin toptan shyǵa ala ma dep ýaıymdaǵan jankúıerler kóńilin bir demdep qoıǵan bolatyn. Sondyqtan olar Ýrýgvaımen oıynda tek kimniń myqty ekenin dáleldeý úshin ǵana jasyl alańǵa shyǵýy qajet edi. Joldama taǵdyryn erterek sheship qoıǵannan keıin quramanyń bas bapkeri Stanıslav Cherchesov quramda birqatar ózgerister jasady. Alǵashqy mınýttan negizgi quramda Fedor Kýdrıashov, Igor Smolnıkov, Alekseı Mıranchýk shyqty. Budan buryn «Reseı men Ýrýgvaı toptyń myqtysyn anyqtaıdy» degen taqyrypta maqala usynǵan edik.
Kezdesý birden-aq shabýylmen bastaldy. Ýrýgvaılyqtar 2-mınýtta alańnyń ortalyq shebinen shabýylǵa kóshti. Vesıno Falero shamamen 27-metrdeı jerden qaqpaǵa soqqy baǵyttaǵan edi. Ol qaqpa baǵanasynan birshama qashyq ketti. Budan keıin de Ońtústik Amerıka qurlyǵynyń ókilderi jasyl alań tórinde basymdyǵyn baıqatyp turdy. Oıynnyń 7-mınýtynda orystar da shabýylǵa shyqty. Qorǵaýshy Ilıa Kýtepov shabýylshy Artem Dzıýbaǵa alystan ádemi pas berdi. Degenmen Artem Dzıýbanyń ilip áketýine ýrýgvaılyq qorǵaýshylar kedergi keltirdi. Ýrýgvaı shabýylshysy Lýıs Sýares 10-mınýtta óziniń múmkindigin golǵa aınaldyrdy. Sol sátte aıyp dobyn oryndaǵan Lýıs Sýarestiń tepken dobyna reseılik qaqpashy Igor Akınfeev eshqandaı amal qoldana alǵan joq.
Arada eki mınýttaı ótkende Reseıdiń esepti teńestiretin múmkindigi boldy. Artem Dzıýba qarsylastar qaqpasy mańynda áriptesi Denııa Cheryshevqa ádemi pas bergen edi. Cheryshev ony qaqpaǵa baǵyttaǵanmen, ýrýgvaılyq qaqpashy Fernando Mýslera ony syrtqa shaǵyryp úlgerdi. Budan keıin qos qurama arasynda gol soǵatyn birneshe múmkindikter kezdesti. 23-mınýtta óz alańynda Denıs Cheryshev qaqpasyna gol soǵyp aldy. Al birinshi kezeńniń 36-mınýtynda tártip buzyp, reseılik qorǵaýshy Igor Smolnıkov ekinshi márte sary qaǵaz aldy. Osynyń nátıjesinde senegaldyq tóreshi Malang Dedıý oǵan qyzyl qaǵaz kórsetip, jasyl alańnan qýdy. Osylaısha 0:2 esebimen jeńilip jatqan reseılikter endi 1 oıynshymen ǵana qaldy.
Toqsan mınýt túgesiler tusta Edıson Kavanı taǵy bir gol soqty. Esep 3:0. A tobynda birinshi oryn Ýrýgvaı quramasyna buıyrdy. Ol endi V tobynda ekinshi oryn alǵan quramamen 30 maýsymda kezdesedi.
Ekinshi kezeńde qos qurama birneshe qaýipti sátterdi uıymdastyrdy. Árıne, Ýrýgvaı quramasynyń basymdyǵy ańǵaryldy. Bul toptaǵy Saýd Arabııasy men Egıpet arasyndaǵy kezdesýde 2:1 esebi tirkeldi. Úshinshi oryn Saýd Arabııasyna buıyrsa, Egıpet tórtinshi oryndy mise tutty.
Sondaı-aq, búgin V tobynda Iran men Portýgalııa («Qazaqstan». 00.00), Ispanııa men Marokko («Qazsport». 00.00) quramalary sheberlik baıqasady.
