Fýtboldan álem chempıonaty: Germanııa men Ispanııa fınalǵa joldamany sarapqa salady
ASTANA. Shildeniń 7-si. QazAqparat - Tórtkúl dúnıe nazaryn ózine aýdarǵan fýtboldan álem chempıonatynyń jartylaı fınalynda búgin aqtyq básekege joldama alatyn ekinshi komanda anyqtalady. Eýropanyń azýly eki quramasy Germanııa men Ispanııa fýtbolshylary Ońtústik Afrıkanyń Dýrban qalasyndaǵy alańda oınaıdy.
Tuńǵysh ret álem chempıony ataǵyn jeńip alýǵa tamasha múmkindik týyp otyrǵan Ispanııa 1/8 fınalda Portýgalııany (1:0), shırek fınalda Paragvaıdy (1:0) esebimen utqan bolatyn. Jalpy 2008 jylǵy Eýropanyń myqty komandasy atanǵan Ispanııa quramasy 1950 jyldan beri álem chempıonatynyń fınaldyq tobyna birinshi ret shyǵyp otyr. Internet basylymdardyń Ispanııanyń Marca sporttyq gazetine silteme jasap habarlaýynsha, atalǵan eldiń patshaıymy quramanyń búgingi oıynyna qatysyp, match aldynda jáne odan keıin de fýtbolshylarmen kezdespek.
Al, aǵylshyndardy 4:1, argentınalyqtardy 4:0 esebimen utyp, jartylaı fınalǵa shyqqan Germanııa bolsa buǵan deıin álem birinshiliginde úsh márte (1954, 1974, 1990) top jarǵan edi. Sonymen qatar Germanııa quramasy álem chempıonatynyń fınalynda tórt márte (1966, 1982, 1986, 2002) oınap, eki ret qola (1934, 2006) júldeger atanǵan bolatyn.
Ońtústik Amerıkanyń, qart qurlyq - Eýropanyń aıtýly quramalaryn jarys jolynan yǵystyrǵan eki komandanynyń oıynyn búgin saǵat 00:30-da «Habar» telearnasynan tamashalaýǵa múmkindik bar. Bul kezdesýge vengerlik referı Vıktor Kashshaı tórelik etedi.
