Fýtboldan álem chempıonaty: Eýropalyq quramalar ótpeli kezeń oıyndaryn ótkizedi
NUR-SULTAN. QazAqparat - Búgin fýtboldan Álem chempıonatynyń irikteý satysynda eýropalyq quramalar ótpeli kezeń oıyndaryn ótkizedi, dep habarlaıdy QazAqparat tilshisi.
Onda barlyǵy 12 qurama baq synaıdy. Olardyń 10-y irikteý kezeńinde óz tobynda ekinshi oryn alǵandar bolsa, qalǵan 2-i Ulttar lıgasynda úzdik nátıjege qol jetkizgen quramalar sanalady.
Quramalar barlyǵy úsh topqa bólingen. Árbir topta jartylaı fınal jáne fınaldyq oıyndar belgilengen. Jartylaı fınalda jeńimpaz atanǵandar fınalda dúbirli dodaǵa beriletin jalǵyz joldamany sarapqa salady. Osylaısha úsh toptan jeńimpazdar Álem chempıonatyna qatysýǵa múmkindik alady.
A tobynda jartylaı fınalda Shotlandııa men Ýkraına, Ýels pen Avstrııa kezdesýi tıis bolatyn. Ýkraınadaǵy saıası jaǵdaıǵa baılanysty Shotlandııa men Ýkraına oıyny belgisiz merzimge keıinge shegerildi.
Al V tobynda Reseı men Polsha, Shvetsııa men Chehııa sheberlik baıqasýy tıis bolatyn. Ýkraınadaǵy ahýalǵa baılanysty Reseı atalǵan saıystan shettetildi. Polsha birden fınalǵa joldama aldy.
S tobynda Portýgalııa men Túrkııa, Italııa men Soltústik Irlandııa quramalary oınaıdy.
Fınaldyq oıyndar 29 naýryzǵa belgilengen.
Eske salsaq, búgin fýtboldan Ulttar lıgasy sheńberindegi ótpeli oıynda Qazaqstan men Moldova kezdesedi.
