Fýtboldan álem chempıonaty: Eýropadaǵy on úzdik qurama anyqtaldy
NUR-SULTAN. QazAqparat - Búgin fýtboldan 2022 jylǵy álem chempıonatyna Eýropadan tikeleı joldama alǵan quramalar tolyqtaı belgili boldy, dep habarlaıdy QazAqparat tilshisi.
Eýropa qurlyǵynda 16 qarashada álem chempıonatyna irikteý kezeńiniń toptyq satysy máresine jetti.
Qazaqstan quramasy baq synaǵan D tobynda syrt alańda Frantsııa Fınlıandııany, Ýkraına Bosnııa jáne Gertsogovınany 2:0 esebimen basym tústi. Atalǵan topta Frantsııa 15 upaı enshilese, Ýkraınada 12 upaı bar. Al Fınlıandııa 12, Bosnııa jáne Gertsogovına 7 upaıdy mise tutsa, Qazaqstan 3 upaı aldy.
Al E tobynda Belgııa Ýelspen 1:1 esebimen teń tússe, Chehııa Latvııany 2:0 esebimen jeńdi.
Sondaı-aq, G tobynda Nıderlandy Norvegııany 2:0, Túrkııa Chernogorııany 2:1 esebimen tize búktirdi. Alǵashqy eki oryn Nıderland pen Túrkııaǵa buıyrdy.
Jarys erejesi boıynsha árbir toptan birinshi oryn alǵan quramalar dúbirli dodaǵa tikeleı joldama aldy. Aıta keterligi, Germanııa men Danııa mundaı múmkindikke qazan aıynda qol jetkizip qoıǵan bolatyn. Al qarasha aıynda olardyń qataryna Frantsııa, Belgııa, Horvatııa, Ispanııa, Serbııa, Anglııa, Shveıtsarııa qosyldy. Olardyń qataryn eń sońynan Nıderland tolyqtyrdy.
Sondaı-aq, álem chempıonaty fınaldyq satysynda alań qojaıyny - Qatar eli baq synaıdy. Al Ońtústik Amerıkadan Brazılııa birneshe týr buryn dúbirli dodaǵa qatysatyny belgili boldy.
Eýropa qurlyǵynda árbir topta ekinshi oryn alǵan jáne Ulttar lıgasynda úzdik kórsetkishke ıe bolǵan eki qurama qosymsha úsh joldamany sarapqa salady. Qazir mundaı múmkindikke irikteý kezeńinde óz toptarynda ekinshi oryn alǵan Portýgalııa, Shvetsııa, Italııa, Ýkraına, Ýels, Shotlandııa, Túrkııa, Reseı, Polsha, Soltústik Makedonııa men Ulttar lıgasynan Aýstrııa men Chehııa qol jetkizdi. Jarystyń atalǵan satysynyń jerebesi bıylǵy jyldyń 26 qarashasynda tartylady.
Árbir toptyń jeńimpazy álem chempıonaty fınaldyq satysyna joldama alady.
