Fýtboldan álem chempıonatynyń jabylý saltanatynda kimder óner kórsetetini belgili boldy

Shoý jergilikti ýaqyt boıynsha saǵat 13:30–da, ıaǵnı fınaldyq oıyn bastalardan 90 mınýt buryn bastalady.

Saltanatty sharada álemdik mýzyka jáne shoý-bıznes juldyzdary Tom Krýz, Laýra Paýzını, Nıkol Sherzınger, Robbı Ýılıams jáne IShowSpeed óner kórsetedi. Al fınal aldynda AQSh-tyń memlekettik ánuranyn «Emmı», «Gremmı», «Oskar» jáne «Tonı» syılyqtarynyń laýreaty Djennıfer Hadson oryndaıdy.

FIFA málimetinshe, bul saltanat álem chempıonaty tarıhyndaǵy eń aýqymdy týrnırdiń sımvoldyq qorytyndysy bolmaq. Bıyl alǵash ret álem birinshiligine 48 qurama qatysty. Shoý Kanada, Meksıka jáne AQSh-ta ótken týrnırge qatysqan komandalardyń jolyna arnalady.

Jabylý rásimin Balich Wonder Studio ázirlep jatyr. FIFA ókilderiniń aıtýynsha, shoýda mýzyka, mádenıet jáne fýtbol toǵysyp, jańa rekordtar ornatqan ári jankúıerlerdiń jańa býynyn shabyttandyrǵan týrnırdiń erekshe atmosferasy kórinis tabady.

— Kanada, Meksıka jáne AQSh-ta ótken ashylý saltanattarynyń rýhyn jalǵastyra otyryp, jabylý rásimi mýzyka, mádenıet jáne fýtboldy toǵystyryp, tarıhı týrnırdiń chempıony anyqtalatyn sheshýshi match aldynda kórermenderge erekshe kóńil kúı syılaıdy, — dedi FIFA 2026 álem chempıonatynyń operatsııalyq dırektory Haımo Shırgı.

Uıymdastyrýshylar aldaǵy kúnderi jabylý saltanatyna qatysatyn ózge ártister men arnaıy qonaqtardyń esimderin jarııalaıtynyn málimdedi.

Jankúıerlerge stadıonǵa erterek kelý usynyldy. Kirý jergilikti ýaqyt boıynsha 11:00–de ashylady. Fınal bastalǵanǵa deıin kórermender úshin oıyn-saýyq baǵdarlamalary, ınteraktıvti aımaqtar jáne basqa da is-sharalar uıymdastyrylady.

Eske salaıyq, buǵan deıin Madonna, Shakıra, BTS jáne Djastın Bıberdiń 2026 jylǵy álem chempıonatynyń fınalynda óner kórsetetini habarlanǵan bolatyn.

Aıta ketelik Qazaqstanda FIFA WORLD CUP 2026 monetalary satyla bastady.