Fýtboldan álem chempıonatynyń ánuranyn kimder oryndaıdy
ASTANA.KAZINFORM — Halyqaralyq fýtbol qaýymdastaqtary federatsııasy (FIFA) búgin bastalatyn fýtboldan álem chempıonatynyń ánuranyn óziniń resmı saıtynda jarııalady.
DNA dep atalatyn kompozıtsııany ıtalııalyq opera ánshisi Andrea Bochellı, álemge tanymal dıdjeı ári prodıýser Devıd Getta, «Gremmı» syılyǵynyń úsh dúrkin ıegeri, amerıkalyq ánshi Megan Thee Stallion jáne «Oskar», «Gremmı» men «Altyn globýs» syılyqtarynyń laýreaty, ońtústikkoreıalyq oryndaýshy EJAE birlesip jazǵan.
— Bul týyndy úsh el men 16 qabyldaýshy qalada ótetin alǵashqy FIFA álem chempıonatynyń rýhyn kórsetedi. Týrnır barysynda 48 qurama álemdegi eń aýqymdy fýtbol arenasynda baq synaıdy, — delingen halyqaralyq uıymnyń málimdemesinde.
Ánuran alǵash ret 11 maýsym kúni jandy daýysta Mehıkoda ótetin fýtboldan álem chempıonatynyń ashylý saltanatynda oryndalady. Ony Andrea Bochellı men EJAE oryndaıdy. Sondaı-aq sharaǵa David Guetta da qatysady.
— Fýtbol meniń ómirimniń ajyramas bóligi jáne árdaıym júregimnen erekshe oryn alady. FIFA álem chempıonatynyń ánuranyn oryndaýǵa jáne ashylý saltanatyna qatysýǵa shaqyrtý alý — men úshin zor mártebe, ári erekshe tolǵanys syılaıtyn oqıǵa, — dedi Bochellı.
Áserimen ánshi EJAE de bólisti.
— Bul men úshin mańyzdy, sebebi án mátininiń bir bóligin koreı tilinde jazý múmkindigine ıe boldym. Osyndaı úlken sahnada Ońtústik Koreıanyń atynan óner kórsetý – zor mártebe. Balalyq shaqtaǵy eń súıikti estelikterimniń biri – 2002 jylǵy álem chempıonaty kezindegi Seýl. Sol ýaqytta búkil qalanyń qalaı birikkenin kórgen edim, — dep atap ótti ol.
Buǵan deıin ÁCh-2026-ǵa qatyspaıtyn TOP-5 juldyz jaıly málim bolǵan.
Sondaı-aq, sýperkompıýter fýtboldan 2026 jylǵy Álem chempıonatynyń basty favorıtin ataǵan.
Nazerke Jumabek
