Fýtboldan álem chempıonaty nege úsh elde ótedi
ASTANA. KAZINFORM – Fýtboldan álem chempıonaty tarıhynda alǵash ret týrnırdi birden úsh memleket – Kanada, Meksıka jáne AQSh qabyldaıdy. Bastapqyda bul elderdiń árqaısysy jarysty ótkizý quqyǵyna jeke ótinim berýdi josparlaǵanymen, keıin kúsh biriktirip, ortaq ótinim usynǵan.
Áýelde Kanada, Meksıka jáne AQSh 2026 jylǵy álem chempıonatyn ótkizý quqyǵyna bólek-bólek úmitker bolmaq bolǵan. Alaıda keıin úsh el kúsh biriktirip, «Birtutas birlik» uranymen ortaq ótinim usyndy.
Mundaı sheshim qabyldaýǵa týrnır aýqymynyń ulǵaıýy áser etti. Eger 2022 jyly Qatarda ótken álem chempıonatyna 32 qurama qatyssa, aldaǵy dodada olardyń sany bir jarym esege artyp, rekordtyq 48 komandaǵa jetedi. Sonymen qatar chempıonat barysynda rekordtyq 104 match ótkiziledi. Bul Qatardaǵy álem birinshiligimen salystyrǵanda 40 oıynǵa kóp.
Qatysýshylar men matchtar sanynyń artýy uıymdastyrý shyǵyndaryn da kóbeıtedi. Stadıondardy daıyndaý, jańǵyrtý jáne týrnırdi ótkizýge qajetti ınfraqurylymdy qamtamasyz etý qomaqty qarjyny talap etedi. Mundaı jaǵdaıda álem chempıonatyn bir ǵana memlekettiń ótkizýi barǵan saıyn kúrdelene túsedi. Sondyqtan mundaı aýqymdaǵy týrnırdi birneshe eldiń birlesip ótkizýi tıimdi sheshim retinde qarastyryldy.
Al Jazeera basylymynyń jazýynsha, Soltústik Amerıkanyń úsh eliniń ortaq ótinimine basymdyq berilýiniń mańyzdy sebepteriniń biri – usynylǵan stadıondardyń daıyn bolýy.
Ótinimge engizilgen arenalardyń barlyǵy burynnan salynǵan jáne aýqymdy qurylys jumystaryn qajet etpeıdi. Sonymen qatar olardyń ortasha syıymdylyǵy 68 myńnan astam kórermenge arnalǵan.
Degenmen munyń ekinshi jaǵy da bar. Ádette iri sporttyq jarystardyń ekonomıka men jumyspen qamtýǵa tıgizetin eń úlken áseri ınfraqurylym salý kezeńinde baıqalady. Sondyqtan daıyn nysandardy paıdalaný bul baǵyttaǵy ekonomıkalyq belsendiliktiń artýyna aıtarlyqtaı yqpal etpeýi múmkin.
Sondaı-aq týrnır ótetin qalalardyń kólik, turǵyn úı, medıtsına, tehnologııa jáne ózge de ınfraqurylymy FIFA talaptaryna tolyq sáıkes keletini nemese odan joǵary deńgeıde ekeni anyqtalǵan.
Eske salaıyq, 2026 jylǵy fýtboldan álem chempıonaty Kanada, Meksıka jáne AQSh-tyń 16 qalasyndaǵy 16 stadıonda ótedi.
Týrnırdi úsh memleket qabyldaǵanymen, matchtardyń basym bóligi AQSh-ta uıymdastyrylady. Munda barlyǵy 78 oıyn ótedi. Al Kanada men Meksıkada 13 matchtan ótkiziledi.
Shırek fınaldar, jartylaı fınaldar jáne fınal sekildi sheshýshi kezdesýlerdiń basym bóligi de AQSh-ta ótedi.
Aıta keteıik, týrnırdiń 100 jyldyǵyna arnalǵan 2030 jylǵy álem chempıonaty tarıhta alǵash ret birden úsh qurlyqtaǵy alty memlekette uıymdastyrylady. Atap aıtqanda, jarysty Ýrýgvaı, Paragvaı, Argentına, Marokko, Ispanııa jáne Portýgalııa qabyldaıdy.
Eske salaıyq, buǵan deıin bıylǵy fýtboldan álem chempıonaty týraly negizgi derekter týraly jazǵanbyz.
