Fýtboldan álem chempıonaty: Horvatııa alǵashqy jeńisine qol jetkizdi
ASTANA. KAZINFORM — Horvatııa 2026 jylǵy álem chempıonatynyń toptyq kezeńiniń ekinshi týrynda Panamany jeńdi, dep habarlaıdy Sports.kz.
L tobyndaǵy match Toronto qalasyndaǵy BMO Field stadıonynda ótti. Oıyn horvattardyń 1:0 jeńisimen aıaqtaldy.
Kezdesýdegi jalǵyz goldy Ante Býdımır soqty. Iosıp Stanıshıchtiń pasynan soń shabýylshy qaqpanyń aldynda bos turǵan sátti paıdalanyp, dopty torǵa engizdi.
Bul jeńis Horvatııa úshin týrnırdegi alǵashqy jeńis boldy. Buǵan deıin olar alǵashqy týrda Anglııadan 2:4 esebimen jeńilgen edi. Bul joly Panama qatarynan ekinshi ret jeńildi: buǵan deıin komanda Ganadan 0:1 esebimen utylǵan bolatyn.
Eki týrdan keıin Anglııa 4 upaı jáne 4:2 esebimen L tobynda kósh bastap tur. Ganada da 4 upaı bar, biraq 1:0 esebi boıynsha ekinshi orynda. Horvatııa 3 upaımen (3:4) úshinshi orynda, al Panama upaısyz, birde-bir gol soqpaǵan kúıde sońǵy orynda (0:2).
Qorytyndy týrda Horvatııa Ganamen oınaıdy, al Anglııa Panamamen kezdesedi. Eki match ta 28 maýsym kúni Astana ýaqytymen 02:00–de ótedi.
Buǵan deıin K tobynda Portýgalııa — Ózbekstan quramalary kezdesti. Bul matchta Krıshtıaný Ronaldýdyń qos goly Portýgalııaǵa jeńis syılady.
