Fýtboldan ÁCh: Jartylaı fınalǵa kim laıyqty – Ýrýgvaı álde Frantsııa
ASTANA. QazAqparat - Búgin Nıjnıı Novgorod qalasynda jartylaı fınalǵa shyqqan alǵashqy komanda anyqtalady, dep habarlaıdy QazAqparat tilshisi.
Ýrýgvaı men Frantsııa komandalary bıylǵy chempıonat barysynda ózderiniń júldeden úmitti ekendikterin kórsetti. Ásirese, 30 maýsym kúni frantsýzdar Messı bastaǵan argentınalyqtardy tize búktirse, ýrýgvaılyqtar Ronaldýy bar Portýgalııany jeńdi.
Ýrýgvaıdyń qorǵanysy myǵym, qarymta shabýylǵa beıim bolsa, frantsýzdar Argentına qaqpasyna tórt gol soqty. Ýrýgvaı sapynda toptyq básekedegi eń úzdik qorǵaýshylar Godın, Laksalt, Hımenes oınasa, Frantsııanyń shabýyl shebindegi Mbappe, Grızmann jáne Jırýdyń jalpy transferlik quny 300 mln eýrodan asyp jyǵylady.
Ýrýgvaıdyń bas bapkeri, 71 jastaǵy maman Oskar Tabares bıylǵy chempıonatta taǵy bir rekord ornatty. Ol dúnıejúzilik doda tarıhyndaǵy eń jasy úlken jattyqtyrýshy bolyp otyr. Buǵan deıin bir quramany tórt ret álemdik jarysqa ákelgen de ózi edi. Sonymen qatar toptyq básekede eshkimdi shydatpaı, Ýrýgvaıdy tórt ret qatarynan pleı-ofqa shyǵardy.
O.Tabareske Frantsııamen kezdesý aldynda bas qatyrýǵa týra keledi. Portýgalııamen matchta jaraqat alyp qalǵan, osy chempıonatta úsh gol soǵyp úlgergen Edınson Kavanıdyń ornyna kimdi shyǵaryp, taktıkany qalaı tańdaý kerek - másele sonda.
1998 jylǵy álem chempıony Dıde Desham jattyqtyratyn Frantsııa quramasynda Argentınamen básekeden keıin 19 jasar Kıllıan Mbappe basty juldyzǵa aınaldy. Álem chempıonatynda eki gol soqqan eń jas oıynshy retinde Peleniń rekordyn qaıtalaǵan Mbappeden qarsylastary da saqtanary sózsiz. Bálkim, 2016 jylǵy Eýropa birinshiliginiń surmergeni Antýan Grızmann nemese Pol Pogbanyń juldyzdy sáti týar.
Qalaı bolǵanda da, júldege qol sozym qalǵan kezde qos komandanyń baryn salary anyq. Kim durys taktıka tańdap, qarsylasynyń osal tusyn taba biledi, sol jeńiske jetedi. Bálkim, asa tartysty oıyn bolyp, ekstrataım, tipti penaltı serııasyna deıin sozylýy ábden múmkin.
Argentınalyq Nestor Pıtana qazylyq etetin bul match Nıjnıı Novgorodtaǵy sońǵy oıyn bolmaq.
Aıta keteıik, bul básekede ozyp shyqqan komanda jartylaı fınalda 10 shilde kúni Sankt-Petorborda Brazılııa - Belgııa jubynyń jeńimpazymen kezdesedi.
