Fýtboldan ÁCh: Japonııa men Senegal quramalary teń tarqasty

Birinshi týrda qarsylastaryn tize búktirip, úsh upaıǵa ıe bolǵan qos qurama úshin bul kezdesý de mańyzdy edi. Sondyqtan olardyń pleı-off básekelerine beriletin joldama úshin baryn salatyny anyq-ty. Óıtkeni bul toptaǵy Polsha men Kolýmbııa myqty komandalar sanatynda.

Italııalyq Djanlýka Rokkı qazylyq etken matchta Japonııa bapkeri Akıro Nısıno myna shákirtterine úmit artty: Eıdzı Kavasıma (qaqpashy), Gen Sedzı, Hırokı Sakaı, Maıa Esıda, ıÝto Nagatomo, Gaký Sıbasakı, Genkı Haragýtı, Takası Inýı, Makoto Hasebe (kapıtan), Sındzı Kagava, ıÝıa Osako.

Buǵan Senegaldyń jattyqtyrýshysy Alıý Sısse ózi senetin oıynshylaryn qarsy qoıdy: Hadım Ndıaıe (qaqpashy), Kalıdý Kýlıbalı, Salıf Sane, ıÝssýf Sabalı, Mýssa Vage, Idrıssa Geıe, Alfred Ndıaıe, Badý Ndıaıe, Ismaıla Sarr, Mbaı Nıang, Sadıo Mane (kapıtan).

Japonııa - Azııadaǵy eń azýly komandalardyń biri. 1968 jyly Mehıko olımpıadasynyń qola júldegeri bolǵan japondar 2002 jáne 2010 jylǵy álem chempıonattarynda ǵana pleı-off kezeńine óte aldy. Qazirgi kezde quramada Eýropa chempıonattarynda dop tebetin tájirıbeli oıynshylar jeterlik.

Senegal úshin Alıý Sısseniń jóni bólek. 2002 jylǵy dúnıejúzilik dodaǵa tuńǵysh ret qatysqan senegaldyqtar óz kapıtany Sısseniń bastaýymen aıdy aspanǵa shyǵaryp, sol kezdegi álem chempıony Frantsııany 1:0 esebimen utty. Sodan keıin toptan shyǵyp qana qoımaı, shırek fınalǵa deıin jetken senegaldyqtar sol chempıonatta qola júldeger atanǵan Túrkııa komandasyna ǵana ese jiberdi. Senegal Afrıka komandalary ishinde Kamerýnnyń 1990 jylǵy erligin qaıtalady. 2010 jyly mundaı nátıjege Gana da qol jetkizdi. Mine, arada 16 jyl ótkende, 42 jasar A.Sısse komanda bapkeri retinde álem chempıonatyna kelip otyr.

Oıyn senegaldyqtardyń qarqyndy shabýyldarymen bastaldy. Senegaldyq fýtbolshylardyń tehnıkalyq sheberligi joǵary ekendigi kórinip turdy. Japondyq qaqpashy Kavasıma 11-mınýtta Sabalıdyń soqqysynan keıin dopty qaıtaramyn dep, Senegal kapıtany, Anglııanyń «Lıverpýl» klýbynda bıyl jasyndaı jarqyldaǵan Sadıo Maneniń aıaǵyna salyp berdi - 1:0.

Aıta keterligi, keı tustarda Sadıo Maneniń (onyń týǵan aǵasy, shabýylshy Malık Mane Oraldyń «Aqjaıyǵynda» oınaıdy) dopty baǵyndyrýdaǵy sheberligi kóz súısindirdi.

Japonııa quramasy tarazy basyn teńestirýge tyrysyp baqty. Sóıtip 34-mınýtta degenderine jetti. Nagatomo alystan berilgen dopty ádemi toqtatyp, Inýıǵa syrǵytty. Takası qaqpa buryshyn dál kózdedi - 1:1.

Bes mınýttan keıin oń qanattan jekedara sýyrylyp shyqqan Nıangtyń soqqysyn Kavasıma qaıtara bildi.

Ekinshi taım da Senegaldyń shabýyldarymen bastalǵanymen, japondar da qarap qalǵan joq. Birneshe ret qaqpaǵa qaýip tóndire bildi. Ásirese, 64-mınýtta Osakanyń ókshemen bergen pasynan keıin Inýı tepken dop qaqpa mańdaıshasyna tıip, asyp ketti. Osylaısha japondyqtardyń batyryna aınala jazdaǵan Inýı arada úsh mınýt ótkende, aıyp alańyna taman senegaldyq Sardy shalyp jyǵyp, eskertý alyp qaldy.

71-mınýtta Senegal ádemi kombınatsııadan keıin gol soǵyp, taǵy alǵa shyqty. Qorǵaýshy Sabalı sol qanattan aıyp alańyna kire berip, dopty asyrdy. Nıang ony taǵy bir qorǵaýshy Mýssa Vagege syrǵytty. Vage shirene tepti - 2:1.

Budan keıin japondar alǵa umtyldy. 78-mınýtta senegaldyq qorǵaýshylardyń qateliginen keıin Inýıdan kelgen dopty alańǵa tyńnan qosylǵan, buryn Máskeýdiń TsSKA komandasynda óner kórsetken Keısýke Honda bos qalǵan qaqpaǵa súńgite saldy - 2:2. Bul jerde oıynshylardy der kezinde almastyrǵan japondyq bapker Akıro Nısınonyń taktıkasy óz jemisin berdi.

Osylaısha keremet oıyn órnegin kórsetip, teń tarqasqan qos quramanyń da enshisinde 4 upaıdan bar. Bul - N tobynda joldama úshin tartys odan saıyn qyza tústi degen sóz.

Eske sala keteıik, N tobynda búgin túnde Qazan qalasynda Polsha - Kolýmbııa jeńis úshin jan alyp, jan berisken básekege túsedi. Óıtkeni ázirge birde-bir upaıǵa qol jetkizbegen olardyń sheginer jeri joq. Sońǵy týrda 28 maýsym kúni Volgogradta Japonııa - Polsha, Samarada Senegal - Kolýmbııa quramalary ózara synǵa túsedi.

Bir qyzyǵy, Volgograd pen Samara óńirleri Batys Qazaqstan oblysymen shektesedi. Volgograd Bókeı ordasy aýdanynan, al Samara Oral qalasynan 250 shaqyrymdaı qashyqtyqta ornalasqan. Sondyqtan bul oıyndardy aldyn ala qam jasasa, qazaqstandyq jankúıerler de tamashalaı alady.