Fýtboldan ÁCh: Tonı Kroos eń sońǵy mınýtta Germanııa quramasyna jeńis áperdi
ASTANA. QazAqparat - Fýtboldan álem chempıonatynyń F tobynda Sochıde Germanııa men Shvetsııa quramalary jasyl alańǵa shyqty, dep habarlaıdy QazAqparat tilshisi.
Bul oıyn, ásirese, álem chempıony Germanııa quramasy úshin asa mańyzdy edi. Birinshi týrda Meksıkaǵa 0:1 esebimen jol bergen nemisterge sheginer jol joq edi. Al shvedter Ońtústik Koreıany dál sondaı eseppen tize búktirgen bolatyn.
Germanııa FIFA reıtıngisinde kósh bastasa, Shvetsııa 24-inshi orynda tur. Qos qurama bir-birimen joldary eń kóp toqaılasqan komandalar bolyp esepteledi. Olar osyǵan deıin 36 kezdesý ótkizse, sonyń 15-inde nemister, 12-sinde shvedter jeńiske jetken, 9 oıyn teń aıaqtalǵan.
Germanııany 2006 jyldan beri jattyqtyratyn syralǵy maman Ioahım Lev bul joly quramaǵa biraz ózgeris engizip, myna oıynshylardy qosty: Manýel Noıer (qaqpashy ári kapıtan), Iozýa Kımmıh, Jerom Boateng, Antonıo Rıýdıger, Ionas Gektor, Tonı Kroos, Sebastıan Rýdı, ıÝlıan Draksler, Marko Roıs, Tomas Mıýller, Tımo Verner.
Shvetsııalyq bapker ıAnn Andersson Germanııaǵa óz saıypqyrandaryn qarsy qoıdy: Robın Ýlsen (qaqpashy), Mıkael Lýstıg, Vıktor Lındelef, Andreas Grankvıst (kapıtan), Lıýdvıg Aýgýstınsson, Albın Ekdal, Sebastıan Larsson, Vıktor Klasson, Emıl Forsberg, Ýla Toıvonen, Markýs Berg.
Polıak Shımon Marchınıak tórelik etken oıyn Germanııanyń shabýylymen bastaldy. Kımmıhtiń oń qanattan bergen dobyn Ýlsen qaıtarǵanymen, Drakslerdiń qaýipti soqqysyna Larsson tosqaýyl qoıa bildi. Odan keıin Gektordyń tepken doby Grankvıstten qaıtty.
Nemister qatty qysqanymen, shvedter qarap qalǵan joq. 12-mınýtta qustaı ushyp, Germanııanyń aıyp alańyna jekedara engen sátinde Markýs Bergti Boateng ıterip qulatty. Alaıda Sh.Marchınıak 11 metrlik núktege nusqaı qoıǵan joq. Bul shvedterdiń narazylyǵyn týǵyzdy.
Kútpegen jerden 32-mınýtta shvedter esep ashty. Tonı Kroos komandalasyna emes, qarsylasyna pas berip qoıǵannan keıin qarymta shabýyl kezinde aıyp alańyna kirgen Ýla Toıvonen dopty Noınerden asyryp tastaı saldy - 1:0.
Oıyn ábden qyzdy. 39-mınýtta osynyń aldynda Rýdıdiń ornyna shyqqan Ilkaı Gıýndogan men Mıýllerdiń soqqylarynan keıin Ýlsen eki márte qaqpasyn aman alyp qaldy. Birinshi taımnyń eń sońǵy sekýndtarynda Bergtiń soqqysyn Noıer de qaıtaryp úlgerdi.
Ekinshi taımda Ioahım Lev Drakslerdi alyp tastap, shabýyl shebine Vernerdiń qasyna Marıo Gomesti qosty. 48-mınýtta Germanııa tarazy basyn teńestirdi, Vernerdiń aıyp alańyna baǵyttaǵan doby Gomeske tıip baryp, Marko Roıstyń tizesinen qaqpaǵa enip ketti. Іle-shala taǵy bir goldyń soǵylýyna sál-aq qaldy. 61-mınýtta Roıs qaqpa aldynda ókshemen tebemin dep, qapy qaldy. Urymtal sátte mundaı «ónerdiń» qajeti joq edi.
Germanııa qarqyndy odan saıyn kúsheıtti. Alaıda dóreki oınap, 82-mınýtta ekinshi eskertý alǵan Boateng alańnan qýyldy. Soǵan qaramastan, nemister shabýyldaýyn toqtatqan joq. 88-mınýtta Gomestiń baspen baǵyttaǵan soqqysyn Ýlsen qaıtardy.
Tóreshi qosymsha bes mınýt qosty. 92-mınýtta alańǵa tyńnan qosylǵan ıÝlıan Brandttyń soqqysy qaqpa jaqtaýynan qaıtty.
Degenmen 95-mınýtta Tonı Kroos aıyp soqqysyn dál oryndaı bildi - 2:1.
Aıta keteıik, buǵan deıin F tobynda Meksıka 2:1 esebimen Ońtústik Koreıany utqan bolatyn. Birde-bir upaı almaǵan ońtústikkoreıalyqtar joldamadan úmitterin úzdi. Meksıkanyń qorjynynda 6 upaı bolǵanymen, bul topta qos joldama máselesi áli sheshilgen joq. Germanııa men Shvetsııanyń enshisinde úsh upaıdan bar. Bul toptan pleı-off básekesine shyqqandar 27 maýsym kúni sáıkesinshe Qazan men Ekaterınbýrgte ótetin Ońtústik Koreıa - Germanııa, Meksıka - Shvetsııa kezdesýlerinde anyqtalady. Meksıkaǵa teń oıyn jetkilikti. Germanııa Ońtústik Koreıany, Shvetsııa Meksıkany jeńse, onda dop aıyrmasy da esepteledi.
