Fýtboldan ÁCh: Serbııamen matchta Rısharlıson Brazılııany jeńiske jetkizdi
Brazılııalyqtar osyǵan deıin bes márte álem chempıony atansa, serbııalyqtar da ońaı shaǵylatyn jańǵaq emes-ti.
Ásirese, osy dúnıejúzilik dodaǵa irikteý saıysynda serbııalyqtar Portýgalııany óz alańynda qapy qaldyryp, topta birinshi orynmen joldamaǵa ıe bolǵan edi.
Budan tórt jyl buryn Reseıde ótken birinshilikte Brazılııa, Shveıtsarııa, Serbııa, Kosta-Rıka bir topqa túsip, pleı-off kezeńine brazılııalyqtar men shveıtsarııalyqtar joldama alǵan-dy. Serbııa Brazılııadan 0:2 esebimen utylǵan bolatyn.
Bul joly birinshi taım Tıte jattyqtyratyn brazılııalyqtar jıirek shabýyldaǵanymen, esep ashylǵan joq.
Ekinshi kezeńde Brazılııa qarqyndy tipti údetti. Dragan Stoıkovıchtiń shákirtteri barynsha qorǵanyp baqty. Birde qaqpashy Vanıa Mılınkovıch-Savıch, birde qorǵaýshylar goldan aman alyp qalyp jatty. Tipti Aleks Sandro tepken dop qaqpa jaqtaýynan keri qaıtty. Degenmen 62-mınýtta Rısharlıson ońtaıly sátti paıdalanyp ketti – 1:0. 73-mınýtta Rısharlıson dopty qaıshylaı teýip, esepti 2:0-ge jetkizdi. Bul onyń ulttyq qurama sapyndaǵy 19-ynshy goly edi. Budan keıin Kazemıro baǵyttaǵan dop qaqpa mańdaıshasyna tıdi.
Sóıtip budan tórt jylǵy burynǵy esep qaıtalandy – 2:0, Brazılııanyń paıdasynda.
Osylaısha, álem chempıonatynda barlyq topta birinshi týr oıyndary máresine jetti.
G tobynda Brazılııa dop aıyrmasymen kósh bastady. Kamerýndi 1:0 esebimen tize búktirgen Shveıtsarııada da úsh upaı bar. 28 qarasha kúni Kamerýn – Serbııa, Brazılııa – Shveıtsarııa quramalary ózara kezdesedi.
Eske sala keteıik, budan buryn Ispanııanyń Kosta-Rıkany 7:0 esebimen oısyrata jeńgenin, Belgııanyń Kanada quramasyn qapy qaldyrǵanyn jazǵan bolatynbyz.
Sondaı-aq Ispanııa dopty ustaý jóninen álem chempıonattarynyń rekordyn ornatty.
Ýrýgvaı men Ońtústik Koreıa teń tústi.
Portýgalııa Ganany utyp, óz tobynda kósh bastady.
Krıshtıaný Ronaldý bes álem chempıonatynda gol soqqan birinshi oıynshy atandy.Foto: Dmıtrıı Golýbovıch, «Chempıonat»
