Fýtboldan ÁCh: Senegal myqty ma, Japonııa ma?
ASTANA. QazAqparat - Búgin Ekaterınbýrg qalasynda N tobynda Japonııa men Senegal komandalary synǵa túsedi, dep habarlaıdy QazAqparat tilshisi.
Japonııa men Senegal birinshi týrda aıdy aspanǵa shyǵaryp, ózderinen áldeqaıda myqty sanalatyn Kolýmbııa men Polshany 2:1 esebimen utyp ketken bolatyn. Endi «Ekaterınbýrg Arena» stadıonynda ótetin, ıtalııalyq tóreshi Djanlýka Rokkı qazylyq etetin ózara oıynda jeńgen qurama joldamaǵa bir taban jaqyndaı túsedi.
Japondar Kolýmbııamen kezdesýde aýtsaıder bolǵanyna qaramastan, úsh upaıdy oljalady. Buǵan 3-mınýtta-aq kolýmbııalyq Karlos Sanchestiń óz aıyp alańynda tártip buzyp, qyzyl qaǵaz alýy áser etti. Sındzı Kagava 11 metrlik núkteden múlt ketken joq. Hýan Kıntero aıyp dobyn dál oryndap, esepti teńestirgenimen, ekinshi taımda ıÝıa Osako óz komandasyna jeńis áperdi.
Buǵan deıin Japonııa 2002 jáne 2010 jyldary álem chempıonattarynyń pleı-off kezeńine shyqty. Ol úshin Akıro Nısıno shákirtterine qalǵan eki kezdesýde keminde teń oıynǵa qol jetkizý kerek.
Senegal quramasy Polshamen básekede myqtylyǵyn tanytty. Oıyn órnegi qalyptasqan, uıymshyl ujym ekendigi kórindi. Kerisinshe polıaktar kóp qatelesti. Bul afrıkalyq komandalardyń bıylǵy birinshiliktegi alǵashqy jeńisi edi. Osyǵan deıin dúnıejúzilik dodaǵa Senegal 2002 jyly qatysyp, alǵashqy matchynda sol kezdegi álem chempıony Frantsııa quramasyn utyp, shırek fınalǵa deıin jetti. Qazirgi bapker Alıý Sısse sol quramada kapıtan bolǵan edi. Sondyqtan onyń óz komandasyn jeńiske jeteleı biletin maman ekendigi anyq.
Bir qyzyǵy, Senegal juldyzdarynyń biri, «lıverpýldik» Sadıo Maneniń týǵan aǵasy, shabýylshy Malık Mane Oraldyń «Aqjaıyǵynda» oınaıdy.
Qos komandanyń aldyn ala quramdary tómendegishe dep aıtýǵa bolady.
Japonııa: Kavasıma - Sakaı, Iosıda, Sedzı, Nagatomo, Hasebe, Sıbasakı, Haragýchı, Kagava, Inýı, Okazakı.
Senegal: H.N'Dıaıe - Vage, Kýlıbalı, Sane, Sabalı, A.N'Dıaıe, Geıe, Sarr, Mane, Sako, Nıang.
Aıta keteıik, N tobynda búgin túnde Qazan qalasynda Polsha - Kolýmbııa jasyl alańǵa shyǵady. Bul komandalardyń qorjynynda upaı joq. Qaı jeńgeniniń joldamaǵa úmiti oıanady. Teń tússe, jaǵdaılary qıyndaı túsedi.
Osy matchpen ekinshi týr oıyndary aıaqtalady. Úshinshi týr matchtary erteń bastalady. Komandalar nátıjeni kún ilgeri bilip qoımas úshin toptaǵy sońǵy básekeler bir ýaqytqa qoıylady.
Foto: www.gettyimages.com
