Fýtboldan ÁCh: Senegal quramasy Polshadan aılasyn asyrdy

Budan buryn «Senegal taǵy da sensatsııa jasaı ma» degen taqyryppen oıymyzdy bildirgen edik. Kútkenimizdeı, afrıkalyqtar bul kezdesýge tosynsyı jasap kelgenin ańǵartty. Qur bosqa kelip-qaıtý maqsattary emestigin bildirdi. Atalmysh kezdesýge Bahreın elinen kelgen Navaf Abdýlla Shýkralla qazylyq etti. Tóreshi oıyn bastalǵanyn bildirip, alǵashqy ysqyryǵyn shalǵan ýaqyttan Polsha Senegal qaqpasy mańyna shoǵyrlandy. Ózderine senimdi keıipte boldy. Stadıonda polıak jankúıerleriniń kóptigi ańǵaryldy. Senegal fýtbolshylary dopqa ıelik etken sátte olar ózderiniń qarsylyǵyn bildirip, ony túrli joldarmen bildirip jatty.

11-mınýtta Senegal shabýylshysy Sadıo Mane qaqpaǵa dop baǵyttaǵan edi. Alaıda ol soqqysy óte álsiz shyqty. Polıak qaqpashysy Voıtseh Shchensny bul soqqyny op-ońaı ustap aldy.  Arada bir-eki mınýt ótkende senegaldyq Salıf Sane aıyp soqqysyn tepti. Degenmen, ol qaqpadan múldem ózge baǵytqa aýyp ketti. Polsha shabýylshysy Kamıl Grosıtskıı 20-mınýtta gol soǵýǵa nıet jasaǵan edi. Alaıda, tepken doby qaqpadan tym joǵary ketti. Budan keıin qos qurama birneshe márte shabýylǵa shyqqan edi. Bul kezdesýdegi alǵashqy goldy senegaldyq fýtbolshylar qaqpaǵa engizdi. Oıyn barysy bylaısha órbigen edi. Senegaldyq Papa Gýıe kezekti shabýyldyń birinde Voıtseh Shchensny qaqpasyna dop baǵyttady. Ol jolaı Polshanyń quramyndaǵy túbi brazılııalyq fýtbolshy Tıagý Chonektiń aıaǵyna tıip, baǵytyn ózgertti. Bul sátte Voıtseh Shchensny ózderin goldan qutqarýǵa eshbir múmkindigi bolǵan joq. Domalaǵan dopqa kóziniń qıyǵymen qaraýdan basqa shamasy kelmedi. Esep - 1:0.
Senegal alǵa shyqty.

Osylaısha olar 16 jyldan keıin taǵy da sensatsııa jasaýǵa jaqyndaı tústi. Budan keıin qos quramanyń da esepti ózgertýge nıeti boldy. Alǵashqy kezeń aıaqtalǵansha esep ózgergen joq.

Polsha úshin dop dodasyn jeńilispen bastaý óte tıimsiz. Óıtkeni, bul topta Japonııa men Kolýmbııa synǵa túsedi. Olardyń eshqaısysy upaı úlestire qoıatyn quramalar sanatyna jatpaıdy. Endeshe, alǵashqy oıynnan qorjyndy tolyqtyrý - basty mindet. Polıaktar birneshe qaýipti sátter uıymdastyrdy. Degenmen olar jaǵdaıyn odan saıyn qıyndatyp aldy. Senegaldyń ekinshi goly 61-mınýtta soǵyldy. Polıaktardyń qorǵanystaǵy qateligin Mbaı Nıang sheber paıdalana bildi. Al 87-mınýtta polıak jigiti Gjegoj Kryhovıak esep aıyrmasyn qysqartty. Oıyn 2:1 esebimen Senegaldyń jeńisimen aıaqtaldy. Atalmysh toptaǵy kelesi týr 24 maýsymda ótedi. Bul týrda Senegal men Japonııa, Polsha men Kolýmbııa kezdesedi.

Aıta keteıik, Álem birinshiliginde sensatsııalar jıi oryn alyp jatyr. Budan buryn D tobyndaǵy Argentına Islandııamen, E tobyndaǵy Brazılııa Shveıtsarııamen 1:1 esebimen teń tússe, F tobynda Germanııa Meksıkadan 0:1 esebimen jeńildi.

Sondaı-aq búgin osy toptaǵy Japonııa Kolýmbııadan 2:1 esebimen basym tústi.  

Bir saǵattan keıin A tobynda ekinshi týr oıyndary bastalady. Álem birinshiliginiń qojaıyny - Reseı quramasy Egıpetpen kezdesedi. Oıyn Astana ýaqytymen 00.00-de  «Qazaqstan» ulttyq telearnasynan tikeleı efırde kórsetiledi.  

Qalǵan oıyndardyń tolyq kestesin myna jerden kórýge bolady.