Fýtboldan ÁCh: Ronaldý Portýgalııa quramasyna jeńis áperdi
ORAL. QazAqparat - Máskeý qalasynda fýtboldan álem chempıonatynyń V tobynda Portýgalııa men Marokko komandalary jasyl alańǵa shyqty, dep habarlaıdy QazAqparat tilshisi.
Birinshi týrda Ispanııamen teń túsken Portýgalııaǵa da, sondaı-aq Iranǵa 0:1 esebimen jol bergen Marokkoǵa da upaı aýadaı qajet edi.
«Lýjnıkı» stadıonynda ótken matchta komandalar mynadaı quramda oınady: Portýgalııa - qaqpashy Rýı Patrısıý, Sedrık, Rafael Gerreırý, Pepe, Joze Fonte, Vılıam Karvalıý, Bernandý Sılva, Joaý Moýtınıý, Gonsalý Gedesh, Joaý Marıý, Krıshtıaný Ronaldý (komanda kapıtany). Marokko - Mýnır Mohamedı, Ashraf Hakımı, Medı Benatıa (komanda kapıtany), Manýel da Koshta, Nabıl Dırar, Mýbarak Býssýfa, Karım El-Ahmadı, ıÝnes Belanda, Hakım Zııeh, Nordın Amrabat, Halıd Býtaıb.
Kezdesý marokkolyqtardyń shabýylymen bastalǵanymen, 4-mınýtta-aq Portýgalııa kapıtany Krıshtıaný Ronaldý bıylǵy chempıonattaǵy óziniń tórtinshi golyn soǵyp, komandasyn alǵa shyǵardy - 1:0.
Birinshi taımda marokkolyqtar baryn salyp, portýgalııalyqtardyń qaqpasyna qaýip tóndirgenimen, esep ózgergen joq.
Kezdesýdiń ekinshi kezeńi de tartysqa toly boldy. Qarsylastar alma-kezek shabýyldap, alǵa umtylyp baqty. 58-mınýtta Portýgalııa qaqpashysy Rýı Patrısıý Belandanyń asa qaýipti soqqysyna tosqaýyl qoıa bildi. 78-mınýtta aıyp dobynan keıin Benatıanyń soqqysy qaqpadan qıys ketti.
Portýgalııalyqtar qorǵanys qamyn kóbirek oılaýǵa májbúr boldy. Degenmen 84-mınýtta óz aıyp alańyna taman marokkolyqtar Ronaldýdy shalyp jyqty. Ronaldýdyń tepken doby oıynshylardan ótpedi.
Aqyry match Portýgalııanyń jeńisimen aıaqtaldy. Portýgalııa upaı sanyn 4-ke jetkizse, eki ret qatarynan 0:1 esebimen utylǵan Marokko pleı-off kezeńine shyǵýdan úmitin úzdi.
Osylaısha Ronaldý dúnıejúzilik dodadaǵy mergender kóshinde jekedara alǵa shyǵýmen birge óz quramasy úshin 85-inshi golyn qarsylastar qaqpasyna engizdi. Bul - Eýropadaǵy eń úzdik kórsetkish.
Eske sala keteıik, V tobynda búgin sondaı-aq Qazan qalasynda Iran men Ispanııa quramalary kezdesedi. Budan buryn Portýgalııa men Marokko komandalarynyń kúsh synasatyny jóninde jazǵan bolatynbyz. 25 maýsym kúni Iran-Portýgalııa, Ispanııa-Marokko oıyndarynan keıin pleı-off kezeńine V tobynan shyqqan qos komanda belgili bolady.
Foto: Sergei Fadeichev/TASS
