Fýtboldan ÁCh: Іrikteý týrnırinde Qazaqstan Ýels komandasyna ese jiberdi

ASTANA. KAZINFORM — Fýtboldan 2026 jylǵy álem chempıonatynyń  irikteý týrnırinde Kardıff qalasynda Ýels Qazaqstan quramasyn qabyldady.

Birinshi taımda alań ıelerinen Denıel Djeıms esep ashsa, Qazaqstan quramasynyń kapıtany Ashat Taǵybergen penaltıden tarazy basyn teńestirdi.

Ekinshi kezeń bastalysymen, 47-mınýtta buryshtamadan berilgen doptan keıin Qazaqstan qaqpashysy Aleksandr Zarýtskıı men qorǵaýshylardyń sátsizdigin Ýels kapıtany, aǵylshyndyq «Tottenhem» oıynshysy Ben Devıs paıdalanyp ketti – 2:1.

Básekeniń 62-mınýtynda Serikjan Mýjıkovty Georgıı Jýkov almastyrǵanymen, odan ózgeris bola qoımady. Kerisinshe alań ıeleriniń shabýyly kúsheıip, A.Zarýtskıı eki márte óz qaqpasyn aman alyp qaldy.

74-mınýtta shabýyl shebindegi Aıbar Jaqsylyqov pen Maksım Samorodov alańnan ketip, olardyń ornyna Abat Aıymbetov pen 16 jastaǵy Dastan Sátpaev oıynǵa qosyldy. Keıin Islam Chesnokovty Ǵalymjan Kenjebek almastyrdy. Biraq qazaqstandyqtar qanshama tyrysqanymen, odan eshteńe shyǵara almady.

Esesine 90-mınýtta oıyn sońyna taman alańǵa shyqqan Rabbı Matondo esepti 3:1-ge jetkizdi.

Osylaısha, Qazaqstan ulttyq quramasy qatarynan resmı toǵyz matchta qarsylastaryn jeńe almaı keledi.

Qazaqstan óz tobyndaǵy kelesi kezdesýin 25 naýryzdan 26-syna qaraǵan túni syrt alańda Lıhtenshteın komandasymen ótkizedi.

Eske sala keteıik, budan buryn Qazaqstan – Ýels matchynda birinshi taımda Ashat Taǵybergenniń tarazy basyn teńestirgenin jazǵan bolatynbyz.