Fýtboldan ÁCh: Reseı quramasy ekinshi jeńisine qol jetkizdi
ASTANA. QazAqparat - Fýtboldan 2018 jylǵy Álem chempıonatynyń «A» tobyndaǵy kezekti oıyn Reseıdiń «Sankt-Peterbýrg» stadıonynda ótti. Bul joly Reseı quramasy Egıpet fýtbolshylaryn utty, dep habarlaıdy QazAqparat tilshisi.
Kezdesý alań ıeleriniń jyldam shabýyldarymen bastaldy. Aldymen Aleksandr Golovın men Denıs Cheryshev alystan soqqy jasady. Munan soń tájirıbeli ıÝrıı Jırkov pen Artem Dzıýba mysyrlyq qaqpashy El-Shenavıdiń daıyndyǵyn bir tekserdi. Egıpettiń «juldyzy» Mohamed Salah birinshi taımnyń orta shebine kelgende belsene tústi. Onyń jıyrma metrdeı jerden aınaldyra tepken doby qaqpadan sál qıys ketse, artynsha Mahmýd Hassan Trezegeniń soqqy jumsaýyna múmkindik jasady. Taǵy da nátıjesiz soqqy.
Ekinshi taımnyń basynda tablodaǵy esepke ózgeris endi. Búgingi oıynda negizgi quramǵa shyǵýy belgisiz bolǵan Roman Zobnın 47-mınýtta Egıpet kapıtany Ahmed Fathıdi qatelesýge májbúr etti. Reseıliktiń soqqysyn qaıtarýǵa umtylǵan Fathı teńbil dopty óz qaqpasyna teýip kirgizip aldy. Óz kezeginde mysyrlyqtar ashyq shabýylǵa kóshti. Áýeli, gol soǵatyn múmkindikti Salah múlt jiberse, kezekti sátte shabýylshy Mohsen tarazy basyn teńestirýge shaq qaldy. Qarymta shabýylǵa shyqqan reseılikter ózderiniń ekinshi golyn soqty. Bul joly Ispanııa chempıonatynda óner kórsetetin Denıs Cheryshev kózge tústi. Ol Marıo Fernandestiń pasyn qajetine jaratty. Osylaısha, D.Cheryshev álem chempıonatyndaǵy mergender tiziminde Krıshtıaný Ronaldýmen teńesti. Shabýyl shebinde joǵary qarqyn alǵan Reseı fýtbolshylary dop aıyrmashylyǵyn 3-ke deıin jetkizdi. 62-mınýtta Artem Dzıýba komandasynyń úshinshi, óziniń álem chempıonatyndaǵy ekinshi dobyna «kórimdik» surady.
Egıpettiń basty «kóziri» M.Salah alańnan golsyz ketken joq. Reseı oıynshysy R.Zobnın óz aıyp alańynda Salahty shalyp jyǵyp, tóreshi 11 metrlik aıyp dobyn belgiledi. Shabýylshy núkteden qatelespedi. Esep - 3:1.
Tóreshi qosqan qosymsha 4 mınýtta anaý aıtarlyqtaı ózgeris bolǵan joq. Kezdesý osy eseppen aıaqtaldy. Reseı quramasy eki oıynda 8 gol soqty. Endi alań ıeleri Ýrýgvaı quramasymen kezdesse, óz tobynda qatarynan eki ret utylǵan Egıpet Saýd Arabııasyna qarsy turady.
