Fýtboldan ÁCh: Portýgalııa Iranmen teń oınap, pleı-off kezeńine shyqty
ASTANA. QazAqparat - Fýtboldan álem chempıonatynyń V tobynda Saransk qalasynda Iran men Portýgalııa quramalary synǵa tústi, dep habarlaıdy QazAqparat tilshisi.
Bul qos komandanyń óz tobyndaǵy sońǵy oıyny edi. Pleı-off kezeńine joldama alý úshin Iranǵa tek jeńis kerek bolatyn. Eýropa chempıony Portýgalııaǵa teń oıyn jetkilikti bolǵanymen, óz tobynda jeńimpaz ataný qaı komanda úshin de mańyzdytuǵyn.
Bir qyzyǵy, qos quramany da portýgalııalyq bapker jattyqtyrady (tipti K.Keırýsh kezinde F.Santýshty baptaǵan eken). Sondyqtan muny olardyń ózara básekesi deýge de bolady. Onyń ústine «Mordovııa Arena» stadıonynda otyrǵan jankúıerlerdiń kópshiligi Iranǵa jaqtasyp, otqa maı quıa tústi.
Paragvaılyq Enrıke Kaseres qazylyq etken matchta Iran quramasynyń bas bapkeri Karlýsh Keırýsh óz otandastaryna qarsy myna quramdy shyǵardy: Alıreza Beıravand (qaqpashy), Ehsan Hadjsafı (kapıtan), Morteza Pýrlıgandjı, Madjıd Hosceını, Ramın Rezaeıan, Vahıd Amırı, Saıd Ezzatollahı, Omıd Ebrahımı, Serdar Azmýn, Alıreza Djahanbahsh, Mehdı Taremı.
Portýgalııalyq Fernandý Santýsh Ronaldý bastaǵan óz serkelerine súıendi: Rýı Patrısıý, Pepe, Rafael Gerreırý, Joze Fonte, Sedrık Sýaresh, Vılıam Karvalıý, Joaý Marıý, Adrıen Sılva, Rıkardý Kýarejma, Andre Sılva, Krıshtıaný Ronaldý.
Úshinshi mınýtta-aq Ronaldýdiń qaýipti soqqysyn Beıravand qaqshyp ala bildi. 9-mınýtta ırandyq qaqpashy men qorǵaýshynyń bir-birin túsinbeýinen paıda bolǵan múmkindikti Joaý Marıý múlt jiberdi.
Irandyqtar qarymta shabýylǵa shyǵýǵa tyrysqanymen, portýgalııalyqtardyń qysymy kúsheıe tústi. Birde dop Beıravandtyń qolynan sýsyp ketse, keleside Ronaldý aıyp soqqysyn qaqpaǵa baǵyttady. 21-mınýtta ırandyqtar da aıyp dobyn oryndap úlgerdi.
Qazannyń «Rýbın» komandasynda oınaıtyn Serdar Azmýnnyń pasynan keıin jekedara shyqqan gollandııalyq «AZ ALKMAAR» klýbynyń surmergeni Alıreza Djahanbahshqa múmkindik bermeı, ushqyr qımyldaǵan Patrısıý óz qaqpasyn aman alyp qaldy. 32-mınýtta dál sol Djahanbahshty shalyp jyqqan Gerreırý eskertý alyp tyndy. Biraq aıyp doby nátıje bergen joq.
45-mınýtta oń qanatta komandalasymen keremet túsinisip, dop almasqan Portýgalııanyń eń tisqaqqan oıynshylarynyń biri, Túrkııanyń «Beshıktash» klýbynyń namysyn qorǵaıtyn 34 jasar Rıkardý Kýarejma tamasha soqqy jasap, toǵyzdyqty dál kózdedi - 1:0. Kýarejma osynyń aldyndaǵy Marokkomen oıynǵa qatyspaǵan bolatyn, sondyqtan sheshýshi kezdesýge tyń keldi.
Ekinshi taımda ırandyqtardyń aıyp alańyna kirip bara jatqan Ronaldý qulap qaldy. Paragvaılyq tóreshi beıneqaıtalaýdan keıin 11 metrlik núktege nusqady. Alaıda Krıshtıanýdyń soqqysyn Alıreza Beıravand qaıtaryp, erlik jasady. Sóıtip ırandyqtardyń úmit otyn sóndirmedi.
Kóp uzamaı eskertý alǵan Kýarejmanyń ornyna Portýgalııa quramyndaǵy úshinshi Sılva - Bernardý Sılva shyqty. Irandyqtar shabýyl shebin barynsha kúsheıtip, tyńnan oıynshylaryn qosty. Portýgalııanyń qorǵanys shebinde, ásirese, Pepe saýatty oınaı bildi.
Match aıaqtalýǵa 10 mınýttan astam ýaqyt qalǵanda, qarsylasyn shyntaǵymen nuqyp qulatqan Ronaldýǵa tóreshi beıneqaıtalaýdy taǵy bir qarap, eskertý berdi. Bul jerde portýgalııalyq jankúıerler Kaserestiń qyzyl qaǵaz kórsetpegenine shúkir degen shyǵar.
90-mınýtta E.Kaseres kezekti beıneqaıtalaýdan keıin bul joly Portýgalııanyń qaqpasyna penaltı belgiledi. Karım Ansarıfard 11 metrlik aıyp dobyn tamasha oryndady - 1:1. Budan keıin ırandyqtar qanshama tyrysqanymen, jeńisti julyp ala almady.
Toptaǵy ekinshi kezdesý Ispanııa men Marokko arasynda Kalınıngrad qalasynda dál osy ýaqytta ótti. Tartysty oıyn 2:2 esebimen teń aıaqtaldy.
Osylaısha V tobynda úzdik shyqqan Ispanııa pleı-off básekesinde A tobynda ekinshi oryn alǵan Reseı quramasymen kezdesetin boldy. Al Portýgalııa Ýrýgvaımen alańǵa shyǵady.
