Fýtboldan ÁCh: Perý Avstralııany «qurǵaq» eseppen jeńdi
ASTANA. QazAqparat - Fýtboldan álem birinshiliginiń toptyq kezeńindegi S tobynda úshinshi týr oıyndary márege jetti. Osy toptaǵy Perý men Avstralııa quramalary arasyndaǵy kezdesýde alǵashqysy 2:0 esebimen jeńiske jetti, dep habarlaıdy QazAqparat tilshisi.
Jankúıer qaýym bul kezdesýge onsha qyzyǵýshylyq bildire qoımady. Onyń sebebi de joq emes. Qos qurama álemdik fýtbolda asa zor baǵalana bermeıdi. Kóp jaǵdaıda olar toptyq kezeńnen árige bara almaıdy. Bıyl da solaı boldy. Avstralııa Danııamen kezdesýde 1:1 esebimen teń oınap, jarysty jalǵastyrý múmkindiginen qol úze qoıǵan joq. Alaıda ádemi oıyn órnegimen kópshilik kózine túse qoımaǵany belgili. Perý de solaı boldy. Ońtústik Amerıka qurlyǵynyń ókilderi alǵashqy eki týrda qarsylastaryna ese jiberdi. Frantsııa men Danııaǵa 0:1 esebimen jeńildi. Sondyqtan olar úshin sońǵy týr eshqandaı máseleni sheshpeıtin edi. Áıtse de, oıyn aldynda bergen baspasóz máslıhatynda sońǵy týrda jeńis úshin jantalasqa túsetinin málimdedi.
Sol úshin de birinshi kezeńde baryn saldy. Gol 18-mınýtta soǵyldy. Ony Hose Paolo Gerreronyń pasynan keıin Andre Karrılo saldy. Bul avstralııalyq jigitterdiń namysyn oıatqandaı. Olar shabýyl shebine kóńil bóldi. Dese de perýlik jigitter oǵan laıyqty qarsy tura bildi. Budan keıin de qos qurama tarapynan birneshe qaýipti sátter boldy. Soǵan qaramastan tablodaǵy esep sol kúıi ózgerissiz turdy.
Budan buryn habarlaǵanymyzdaı, atalmysh kezdesýdiń qos qurama úshin tarıhı mańyzy boldy. Ekeýi mundaı dodada birneshe márte baq synaǵanymen bir-birimen joldary túıise qoımaǵan eken. Sondyqtan atalmysh oıyn olardyń jasyl alań tórinde tuńǵysh ret sheberlik baıqasqan kezdesýi retinde saqtalyp qaldy.
Kezdesý taǵdyry 50-mınýtta tolyqtaı sheshilgen sekildi. Perý sapynan Hose Paolo Gerrero mergendik tanytyp, esepti ulǵaıta tústi. Esep 2:0. Ońtústik Amerıkadan kelgen qurama osylaısha esepti ústemeledi. Avstralııa tarazy basyn teńestirýge qansha tyrysqanymen, odan eshbir nátıje bolmady.
Aıta keteıik, búgin S tobynda taǵy bir kezdesý ótti. Frantsııa men Danııa arasyndaǵy oıynda 0:0 esebi tirkeldi. Jarysty jalǵastyrý múmkindigine Frantsııa men Danııa ıe boldy. Úshinshi oryn Perýge buıyrsa, tórtinshi oryn Avstralııanyń enshisine jazyldy.
Búgin sondaı-aq D tobynda Nıgerııa men Argentına («Qazaqstan».00.00), Islandııa men Horvatııa («Qazsport». 00.00) quramalary kezdesedi.
Erteń, 27 maýsymda E jáne F toptaryndaǵy quramalar toptyq kezeńdegi úshinshi týr oıyndaryn ótkizedi. E tobynda Serbııa men Brazılııa («Qazaqstan». 00.00), Shveıtsarııa men Kosta-Rıka («Qazsport». 00.00) kezdesedi. Al F tobynda Meksıka men Shvetsııa («Qazsport». 20.00), Ońtústik Koreıa men Germanııa («Qazaqstan». 20.00) quramalary oınaıdy.
