Fýtboldan ÁCh: Nıderdand pen Ekvador quramalary teń tarqasty

ASTANA. QazAqparat – Qatarda fýtboldan ótip jatqan álem chempıonatynda A tobynda Nıderland – Ekvador quramalary sheberlik baıqasty, dep habarlaıdy QazAqparat tilshisi.

Alǵashqy týrda Ekvador Qatardy, al nıderlandtyqtar Senegaldy 2:0 esebimen tize búktirgen edi.

Búgingi matchta jeńgen komanda óz tobynda úzdik atanýǵa bir taban jaqyndaıtyn edi.

Eýropalyqtar jyldam gol soǵa aldy. 6-mınýtta Kodı Gakpo aıyp alańyna kirmesten, alystan qaqpa buryshyn dál kózdedi – 1:0. Senegalmen ótken oıynda da K.Gakpo esep ashqan bolatyn.

Ekinshi taım bastalǵannan keıin 49-mınýtta nıderlandylyq qaqpashy Andrıs Noppert Pervıs Estýpınıanniń soqqysyn qaıtarǵanymen, dopqa birinshi bolyp jetken Ekvador kapıtany Enner Valensııa osy birinshiliktegi úshinshi golyn soqty – 1:1. 10-mınýttan keıin Gonsalo Plato tepken dop qaqpa mańdaıshasynan keri qaıtty.

Osylaısha, Nıderdand pen Ekvador quramalary teń oıyndy qanaǵat tutty. Olardyń qorjynynda tórt upaıdan bar, dop aıyrmasy da birdeı. Bul topta osynyń aldynda Qatardy jeńgen Senegaldyń enshisinde úsh upaı bar. 29 qarasha kúni Nıderland – Qatar, Ekvador – Senegal quramalary alańǵa shyǵady. Alań ıeleri joldamadan úmitin úzse, qalǵan úsh komanda pleı-ofqa shyǵýǵa múmkindik beretin aldyńǵy eki oryn úshin talasady.

Eske sala keteıik, budan buryn fýtboldan álem chempıonatynda Portýgalııanyń Ganany utyp, óz tobynda kósh bastaǵanyn jazǵan bolatynbyz.

Sondaı-aq Krıshtıaný Ronaldý bes álem chempıonatynda gol soqqan birinshi oıynshy atandy.

Serbııamen matchta Rısharlıson Brazılııany jeńiske jetkizdi.

Argentına men Germanııa favorıtterdiń úzdik úshtiginen shyǵyp qaldy.

Iran sońǵy mınýttarda Ýelsti jeńip ketti.

Senegal quramasy Qatardy jeńdi.

Foto: Francois Nel/Getty Images