Fýtboldan ÁCh: Messıi bar Argentına Nıgerııany utyp, joldamany jeńip aldy

Bul topta eki týrdan keıin 6 upaıy bar Horvatııa quramasy joldama máselesin sheship qoıǵan bolatyn. Al Nıgerııanyń enshisinde 3, Argentına men Islandııada 1 ǵana upaı bolǵandyqtan, ekinshi joldamadan osy komandalardyń úsheýi de úmitin úzbegen edi.

Túrkııalyq tóreshi Djıýneıt Chakyr qazylyq etken matchta Nıgerııanyń bas bapkeri, nemis mamany Gernot Ror myna oıynshylarǵa senim artty: Frensıs Ýzoho (qaqpashy), Leon Balogýn, Ýılıam Ekong, Kennet Omerýo, Braıan Idový, Vıktor Mozes, Djon Obı Mıkel (kapıtan), Ogenekaro Etebo, Vılfred Ndıdı, Ahmed Musa, Kelechı Iheanacho.  

Budan tórt jyl burynǵy álem chempıonatynyń kúmis júldegeri Argentınany jattyqtyratyn Horhe Sampaolı D tobyndaǵy sońǵy shaıqasqa biraz ózgeris engizip, óz oıynshylaryn shyǵardy: Franko Armanı (qaqpashy), Gabrıel Merkado, Nıkolas Otamendı, Markos Roho, Nıkolas Talıafıko, Haver Maskerano, Ever Banega, Entso Peres, Anhel Dı Marııa, Lıonel Messı (kapıtan), Gonsalo Igýaın.

Barynsha iri eseppen jeńiske jetý kerek bolǵandyqtan, H.Sampaolı bul joly shabýyl shebine úsh birdeı fýtbolshyny qosty. Dı Marııa, Messımen birge alǵashqy mınýttan Igýaın oınady. F.Armanı da qaqpaǵa birinshi ret turdy.

Qos komanda úshin de asa mańyzdy kezdesý argentınalyqtardyń shabýylymen bastaldy. Messıdiń alańǵa erekshe kúsh-jigermen shyqqany birden baıqaldy.

Baneganyń 30-40 metrden alǵa asyrǵan pasyn múlt jibermegen Messı 14-mınýtta qorǵaýshyny aldap ótip, oń qanattan qaqpa buryshyn dál kózdedi - 1:0. 27-mınýtta qaqpashymen jekedara shyqqan Igýaınnyń gol soǵýyna Ýzoho múmkindik bergen joq.

Bes mınýt óter-ótpeste aıyp alańyna taman Dı Marııany nıgerııalyqtar shalyp jyqty. Messı tamasha oryndaǵan aıyp doby Ýzohonyń saýsaq ushyna tıip baryp, qaqpa jaqtaýynan keri qaıtty.

Ekinshi taım basynda buryshtamadan berilgen doptan keıin Djıýneıt Chakyr Argentınanyń eń tisqaqqan fýtbolshylarynyń biri Haver Maskerano óz aıyp alańynda Leon Balogýndy qushaqtap qulatqandyqtan, 11 metrlik penaltı belgiledi. 51-mınýtta londondyq «Chelsıdiń» namysyn qorǵaıtyn Vıktor Mozes múlt ketken joq - 1:1.

Argentınalyqtar alǵa umtylǵanymen, nıgerııalyqtar qarymta shabýylǵa shyǵyp otyrdy. 75-mınýtta Ahmed Musa sol qanattan aıyp alańyna dop asyrdy. Ekinshi taımda alańǵa shyqqan Odıon Igalo qaqpany dál kózdeı almady. Dop argentınalyq Markos Rohonyń qolyna tıgenimen, tóreshi bul joly beıneqaıtalaýdan keıin penaltı belgileýdi qup kórgen joq. 83-mınýtta Igalonyń soqqysyn Armanı qaıtaryp úlgerdi.

Baryn salǵan argentınalyqtar 86-mınýtta degenine jetip, Krıstıan Pavonnyń oń qanattan bergen pasynan keıin ortalyq qorǵaýshy Markos Roho qaqpa buryshyn dál kózdedi - 2:1.

Sóıtip Messıi bar argentınalyqtar Nıgerııany tize búktirip, joldamany jeńip aldy.

Bul topta Dondaǵy Rostovta Islandııa men Horvatııa quramalary kezdesip, onda horvatııalyqtar 2:1 esebimen jeńiske jetti.

Osylaısha D tobynda 9 upaımen ozyp shyqqan Horvatııa pleı-off kezeńinde S tobynda ekinshi oryndy ıelengen Danııamen alańǵa shyǵady. Al Argentına S tobynda úzdik atanǵan Frantsııamen shırek fınal joldamasyn sarapqa salady.