Fýtboldan ÁCh: Messı Argentınany alǵa súıreı ala ma?
ORAL. QazAqparat - Búgin túnde fýtboldan álem chempıonatynyń ortalyq kezdesýi Argentına men Horvatııa arasynda ótedi, dep habarlaıdy QazAqparat tilshisi.
Nıjnıı Novgorod qalasynda ótetin matchta Horhe Sampaolı jattyqtyratyn argentınalyqtar baryn salatyny anyq. Birinshi týrda Lıonel Messı penaltıdi soǵa almaı, Islandııamen teń oınaǵan eki márte álem chempıondarynyń endi sheginer jeri joq.
Alǵashqy oıynynda Nıgerııany 2:0 esebimen tize búktirip, D tobynda kósh bastaǵan Horvatııa quramynda da mańdaıynan jel esken juldyzdy oıynshylar jeterlik. Áıtse de Nıgerııamen básekeden keıin shı shyǵyp, «arqam aýyrdy» dep, alańǵa shyǵýdan bas tartqan Nıkola Kalınıchti bas bapker Zlatko Dalıch úıine qaıtardy. «Maǵan saqadaı saı fýtbolshylar kerek», degen bapker sóziniń jany bar.
Qazirgi tańda horvattar Messıdi qalaı toqtatady degen másele kóbirek talqylanýda. Tipti Z.Dalıch Messımen «Barselonada» birge oınaıtyn, komandalasyn búge-shigesine deıin biletin Ivan Rakıtıchten syr tartypty. «Barsanyń» syralǵy qarsylasy - Madrıdtyń «Realynda» dop tebetin, shabýyldyń bárin uıymdastyra alatyn aqyldy oıynshy Lýka Modrıchtiń ózi bir tóbe. Argentınanyń quramynda qorǵanysty tas qylyp ustaıtyn Haver Maskerano, Markos Roho, Nıkolas Otamendı, aldyńǵy shepte jasyndaı jarqyldaıtyn Anhel Dı Marııa, Serhıo Agýero, Gonsalo Igýaın sekildi myqtylar jetkilikti. Birinshi oıynda Sampaolı Igýaındy alańǵa birden shyǵarǵan joq, bul joly ol qandaı taktıka ustanady, muny kezdesý kórsetedi. Qaıtkende de shabýylǵa kóbirek kóńil bóleri túsinikti.
Bul básekege ózbekstandyq tóreshi, 40 jastaǵy Ravshan Irmatov qazylyq etedi. 2014 jylǵy dúnıejúzilik dodada ol tórt matchta tórelik etip, sonyń bireýinde horvattar Meksıkaǵa 1:3 esebimen jol bergen bolatyn.
Argentına men Horvatııa quramalary osyǵan deıin ózara tórt kezdesý ótkizip, sonyń bári tartysqa toly boldy. Sonyń ishinde budan jıyrma jyl burynǵy álem chempıonatynda argentınalyqtar horvattarmen bir topta oınap, 1:0 esebimen basym tústi. Degenmen dál sol dodada horvattardyń qola júldege qol jetkizgeni belgili. Sodan keıin olar tipti toptan shyǵyp kórgen emes.
Sonymen, fýtboldy shemishkedeı shaǵatyndar Argentınaǵa senim artýda. Alaıda tosyn nátıjeler jıi tirkelip jatyrǵan bul birinshilikte Horvatııa jeńiske jetip, pleı-ofqa beriler joldamaǵa ıelik etse, tańǵalmaýǵa bolady.
Aıta keteıik, chempıonattaǵy básekelestigi asa joǵary, eń qıyn top bolyp eseptelip otyrǵan D tórttiginde Nıgerııa - Islandııa matchy erteń Volgogradta ótedi.
