Fýtboldan ÁCh: Meksıkalyqtar Shvetsııadan jeńilse de, kelesi aınalymǵa ótti
ASTANA. QazAqparat - Búgin Fýtboldan álem birinshiliginiń F tobyndaǵy sheshýshi matchtar oınaldy. Ekaterınbýrg qalasynda Meksıka men Shvetsııa quramalary kezdesti, dep habarlaıdy QazAqparat tilshisi.
Ekaterınbýrgtegi oıyn bastalysymen Shvetsııa quramasy shabýylǵa kóshti. Alaıda, oıynnyń nebári 15-sekýndynda meksıkalyqtar tártip buzdy. Tóreshi Nestor Pıtana shabýyldaýshy jartylaı qorǵaýshy Ýla Toıvonendi shalyp jyqqany úshin Hesýs Galıardoǵa eskertý qaǵazyn berdi. Osylaısha, álem chempıonattary tarıhyndaǵy eń jyldam «sary qaǵazdyń» avtory belgili boldy.
Kezdesý eki jaqtyń jyldam shabýyldarymen jalǵasty. Shvetsııa sapynan Forsberg pen Berg, meksıkalyq Chıcharıto men Velalar álsin-álsin soqqylar jasady. Biraq, olar tepken doptyń biri de qaqpaǵa daryǵan joq. 30-mınýtta Meksıka úzdigi Chıcharıto óz aıyp alańynda qolmen oınady. Tóreshi beıneqaıtalaýǵa júginip, tártip buzylmaǵanyn aıtty.
Buryshtama dobynan soń baspen soqqy jasaǵan Markýs Bergke ońtústik amerıkalyq qaqpashy Gılermo Ochoa qarsy turdy. Týra kelgen dopty qaqpa baǵanasynan asyryp shyǵaryp jiberdi.
Oıynnyń 50-mınýtynda qorǵaýshy Lıýdvıg Aýgýstınson Shvetsııany alǵa shyǵardy. Ol Ýla Toıvonenniń aıaǵyna tıip, serpilip kelgen dopty keregine jaratty. Іle-shala uıymdastyrylǵan jyldam shabýyl kezinde Lıýdvıg Aýgýstınson taǵy bir múmkindik aldy. Onyń aınaldyra tepken doby qaqpadan sál ǵana bıik ushty.
Arada 10 mınýt ótken soń shvedter taǵy bir dop soqty. Meksıkalyq qorǵaýshy E.Moreno qarsylas shabýylshy M.Bergti shalyp qulatty. Penaltı! Shvetsııa kapıtany Andreas Grankvıst komandasynyń ekinshi dobyn engizdi.
Negizgi ýaqyttyń aıaqtalýyna 15 mınýt qalǵanda meksıkalyq qorǵaýshy Edson Alvares baıqaýsyzda dopty óz qaqpasyna teýip kirgizip aldy. Ol aýttan kelgen dopty qaıtaramyn dep qatelikke boı aldyrdy.
Tóreshi qosqan 4 mınýtta meksıkalyqtar esep aıyrmasyn qysqartýǵa tyrysqanymen, esep ózgerissiz qaldy.
Osy toptaǵy ekinshi oıyn Ońtústik Koreıa-Germanııa arasyndaǵy match 2:0 esebimen koreıalyqtardyń paıdasyna sheshildi. Sol sebepti, F tobynan Meksıka men Shvetsııa kelesi aınalymǵa shyǵyp otyr.
Foto: ru.fifa.com
