Fýtboldan ÁCh: Meksıkadan jeńilýimiz múmkin - Brazılııanyń jartylaı qorǵaýshysy
ASTANA. QazAqparat -Reseıde ótip jatqan 2018 jylǵy Álem chempıonatynyń 1/8 fınaly aıasynda búgin Brazılııa men Meksıka quramalary kezdesedi, dep habarlaıdy QazAqparat tilshisi.
Meksıka quramasy osy chempıonattyń eń qaýipti komandasyna aınalǵany belgili. Toptyq kezeńniń 1-týrynda Germanııany tize búktirgen kezdesýde «atstekter» kútpegen jerden kóp kúshpen shabýyldap, álem chempıondaryn sastyryp tastady. 35-mınýttaǵy Losanonyń goly da osyndaı josparly shabýyldardyń arqasynda soǵyldy. Onyń ústine bıyǵy mýndıal favorıtterdiń týrnırden erte shyǵyp qalýymen este qalyp jatyr. 1/8 fınal oıyndarynyń jartysy da ótip bolmaı jatyp, ataǵy jer jarǵan qurama komandalardyń ishinen tek Brazılııa men Frantsııa ǵana qaldy. Árıne, sońǵy jyldary qaıta túlegen Anglııa men burynǵy bóltirikteri qasqyrǵa aınalǵan Belgııany da osy topqa qosýǵa bolatyn shyǵar.
Onyń ústine Brazılııanyń birneshe jetekshi oıynshysy jaraqat alǵan. Vınger Dýglas Kostanyń búgingi oıynǵa qatyspaıtyny anyq. Budan tys, sol qanattaǵy negizgi qorǵaýshysy Marselo men oń qanat laterali Danılonyń da densaýlyǵy syr berip júr. Olardyń ornyna Felıpe Lýıs pen Fagner alańǵa shyǵýy múmkin. Al Meksıkada quram jaǵynan qıyndyqtar joqtyń qasy. Tek ortalyq qorǵaýshy Ektor Moreno ǵana dıskvalıfıkatsııaǵa baılanysty osy oıynǵa qatysa almaıdy. Onyń ornyna «Tıgresten» shaqyrylǵan Ýgo Aııala nemese 5-shi ret mýndıalǵa qatysyp otyrǵan s shyǵýy múmkin.
Brazılııanyń jaýyryny jerge tımeı kele jatqanyna týra bir jyl toldy. Sońǵy 14 oıynda nebári 3-aq gol jibergen «pentakampeondar» osy serııany Meksıkaǵa qarsy oıynda da jalǵastyrýǵa nıetti ekeni anyq. Onyń ústine álem chempıonattary aıasynda Brazılııa Meksıkamen 4 ret kezdesip, sonyń úsheýinde 11 gol soǵyp jeńiske jetken, taǵy bir oıynda komandalar golsyz ymyraǵa kelgen.
Quramynda Neımar, Gabrıel Jezýs, Felıpe Koýtıno, Vıllıan sekildi juldyzdary bar Brazılııa úzdik oıyndarynyń birin osy matchta kórsetpek. Oıyn aldyndaǵy baspasóz máslıhatynda jartylaı qorǵaýshy Kazemıro da osyndaı pikir bildirdi. «Qarsylastyń tabandylyǵy bizdi qataıta túsedi. Básekeniń joǵary bolýy zańdylyq. Biz erteńgi matchta úzdik oıyn kórsetsek te, jeńilip qalýymyz múmkin, óıtkeni bul - fýtbol. Biraq biz jeńilsek te Brazılııanyń úzdik oıynyn kórsetýimiz qajet», - deıdi fýtbolshy.
Meksıka bas bapkeri Hýan Karlos Osorıo óz shákirtteriniń 1-týrdaǵy sekildi shabýyldy oıyn órnegin kórsetetinin aıtyp otyr. «Biz eshteńeden qoryqpaımyz, qorǵanysqa buǵyp jatyp almaımyz. Bul jaǵynan Brazılııada óte jaqsy fýtbolshylar kóp. Biz de shabýyl shebine kem degende 4-5 oıynshyny shyǵaramyz. Shákirtterim uly komandaǵa qarsy oıynda tarıhı jeńiske jetýi múmkin ekenin jaqsy túsinedi», - deıdi maman.
Qarsylastardyń oıyn aldyndaǵy qulshynysyna, komandalardyń qorǵanys shebinde aqaýlardyń bar ekendigine nazar aýdarsaq, búgingi kezdesýde kóbirek gol kóremiz dep úmittenýge bolady. Bir aıta keterligi, Samarada búgin kún shaıdaı ashyq, jergilikti ýaqytpen keshki 18:00-ge qaraı aýa temperatýrasy 31-33 gradýs ystyq bolady.
Oıyn Samaradaǵy «Samara Arena» stadıonynda Astana ýaqytymen 20:00-de bastalady. Ony Qazsport telearnasy arqyly tikeleı efırden tamashalaýǵa bolady.
1/8 fınaldyń qalǵan oıyndarynyń tolyq kestesin myna jerden kórýge bolady.
