Fýtboldan ÁCh: Mbappedeı jas juldyzy bar Frantsııa Argentınany tize búktirdi
ASTANA. QazAqparat - Búgin Qazan qalasynda Argentına men Frantsııa quramalary shırek fınal joldamasyn sarapqa saldy, dep habarlaıdy QazAqparat tilshisi.
Buǵan deıin argentınalyqtar álem chempıonatyn 1978 jáne 1986 jyldary eki márte utsa, Frantsııanyń 1998 jyly óz elinde ótken birinshilikte úzdik shyqqany belgili.
Irandyq Alıreza Faganı tóreshilik etken matchta Frantsııanyń qazirgi bapkeri, 1998 jylǵy álem chempıony Dıde Desham alańǵa myna quramdy shyǵardy: Ýgo Lorıs (qaqpashy), Benjamen Pavar, Rafael Varan, Samıýel Ýmtıtı, Lýkas Ernandes, Pol Pogba, Ngolo Kante, Blez Matıýıdı, Antýan Grızmann, Kılıan Mbappe, Olıve Jırý.
Argentınalyq jattyqtyrýshy Horhe Sampaolı komanda kapıtany Messı bastaǵan oıynshylaryna senim artty: Franko Armanı, Gabrıel Merkado, Nıkolas Talıafıko, Nıkolas Otamendı, Markos Roho, Haver Maskerano, Ever Banega, Entso Peres, Krıstıan Pavon, Anhel Dı Marııa, Lıonel Messı.
Frantsııanyń quramy argentınalyqtarǵa qaraǵanda, birshama jas bolǵanymen, transferlik quny eń qymbat komanda. Degenmen D.Desham 14 fýtbolshysynyń buryn álem chempıonatynda óner kórsetpegenin, ıaǵnı tájirıbesi azdaý ekenin eske salǵan-dy. Argentınada baǵasy asa qymbat turatyn, árıne, Messı ǵana. 
Alma-kezek shabýylmen bastalǵan oıynda 8-mınýtta argentınalyqtar óz aıyp alańyna taman oıyn tártibin buzdy. Antýan Grızmann tepken dop qaqpa mańdaıshasynan qaıtty. 11-mınýtta qaqpaǵa qaraı oqtaı ushqan 19 jasar Kılıan Mbappeni Markos Roho ıterip jiberdi. 11 metrlik penaltı belgilenip, Roho eskertý aldy Bul joly Grızmann múlt ketken joq - 1:0. Nebári 13-mınýt ótip jatqan-dy.
19-mınýtta Mbappeni óz aıyp alańyna taman shalyp jyqqan Nıkolas Talıafıko da eskertý alyp tyndy. Pol Pogbanyń aıyp soqqysy qaqpadan joǵary ketti. 26-mınýtta Grızmannyń qaýipti pasyn Franko Armanı qaqshyp ala bildi.
Argentınalyqtar da qarap qalmaı, 41-mınýtta Anhel Dı Marııa keremet soqqy jasap, alystan toǵyzdyqty dál kózdedi - 1:1. Orta tusta ashyq qalǵan ony eshkim ustap úlgermedi.
Ekinshi taım basynda Dı Marııaǵa qarsy oıyn tártibi buzylyp, aıyp doby belgilendi. Aıyp alańyna berilgen dopty Messı soqqannan keıin Gabrıel Merkado aıaǵyn qoıyp úlgerdi. Sóıtip 47-mınýtta argentınalyqtar alǵa shyqty.
56-mınýtta argentınalyq qorǵaýshy men qaqpashynyń túsinbestiginen Grızmann gol soǵyp kete jazdady. Esesine sálden soń frantsýzdardyń ádemi kombınatsııasynan keıin Lýkas Ernandestiń pasyn paıdalanǵan qorǵaýshy Benjamen Pavar tamasha soqqymen 57-mınýtta tarazy basyn teńestirdi - 2:2.
64-mınýtta aıyp alańynda ekinshi taımda tyńnan qosylǵan qorǵaýshy Federıko Fasıony aldap ótken Mbappe dopty torda týlatty - 3:2.
68-mınýtta Olıve Jırýdan pas alǵan Mbappe óziniń ekinshi golyn soqty. Bul onyń osy birinshiliktegi úshinshi goly edi.
Buǵan deıin 1998 jylǵy álem chempıonatynda eń jas oıynshy esebinde aǵylshyn shabýylshysy Maıkl Oýen eki gol soǵyp, rekord jasaǵan edi. Mbappe sol rekordty jańartty.
Bir qyzyǵy, Frantsııa 1998 jyly álem chempıony atansa, Mbappe dál sol jyldyń 20 jeltoqsanynda dúnıege kelgen eken. Arada jıyrma jyl ótkende, Mbappe Frantsııa sapynda úzdik atanyp, Argentına qaqpasyna qos gol soǵady dep kim oılaǵan!
Sonymen qatar D.Desham Frantsııanyń bas bapkeri retinde 80-inshi oıynyn ótkizip, bul jóninen de óz eli boıynsha ozyq nátıjege qol jetkizdi.
Match aıaǵyna deıin argentınalyqtar qalaıda gol soǵýǵa tyrysyp baqty. 85-mınýtta aıyp alańyna ekpindeı engen Messı soqqan dop Ýgo Lorıstiń qolynan tabyldy.
Ekinshi taımda alańǵa shyqqan shabýylshy Serhıo Agýero 93-mınýtta esepti qysqarta aldy - 4:3.
Osylaısha asa tartysty oıynda Argentınany 4:3 esebimen tize búktirgen Frantsııa quramasy shırek fınalda 6 shilde kúni Nıjnıı Novgorodta Ýrýgvaı - Portýgalııa jubynyń jeńimpazymen kezdesedi.
