Fýtboldan ÁCh: Máskeýge 2,7 mln týrıst keldi
ASTANA. QazAqparat - Fýtboldan ótip jatqan Álem chempıonatyna baılanysty Reseıge aǵylǵan týrıster sany eselep artty. Tek el astanasy Máskeýdiń ózine fýtboldy kórýge 2 mıllıon 700 myń týrıst kelgen. Bul týraly Reseı Federatsııasynyń týrızm jónindegi federaldyq agenttigine silteme jasap «Habar 24» arnasy habarlaýda.
Atap ótilgendeı, Máskeýge kelgen týrıster sany 19 paıyzǵa, Saranskide 1678 paıyzǵa ulǵaıǵan. 300 myń ǵana turǵyny bar Saransk úshin bul tarıhı jaǵdaı boldy. Al Mordovııa astanasyna on myńǵa jýyq perýlik kelip-ketken soń shahar Perýansk dep atalatyn jańa beıresmı ataýǵa ıe boldy. Sheteldikterdi reseılik qalanyń ataýlary ábden ábigerge saldy. Biri Rostovtaǵy Dondy Uly Rostovpen shatastyrsa, biri Tómengi Novgordqa jol júrip, Uly Novgordtan bir-aq shyqqan. Al qytaılyq týrıster Máskeý ýnıversıtetin tamashalaýdyń ornyna Mordovııalyq joǵary oqý ornyna baryp qaıtqan.
«Túrli qyzyqty jaǵdaılar boldy. Jankúıerler Tómengi Novgordty Uly Novgorodpen shatastyryp alǵan. Biraq jergilikti turǵyn sheteldikterdi jaqsy qarsy alǵan. Týrıster de fýtboldy kóre aldy. Tek stadıonnan emes, úlken plazmalyq teledıdardan. Bizdiń adamdar aqpeıil ǵoı. Eshkimdi qıyndyqta qaldyrmaıdy», - deıdi RF týrızm jónindegi federaldyq agenttiginiń basshysy Oleg Safonov.
Mýndıal ótken qalalarda týrıster aǵyny orta eseppen on esege ósken. Uıymdastyrýshylar jankúıerlerdiń jaǵdaıyn jasaý úshin túrli sharalarǵa barǵan. Mysaly, Máskeýdegi oıynnyń kestesi jol keptelisin eskerip jasalynǵan.
«Máskeýde juma kúnderi oıyn ótken joq. Sebebi jaz ýaqytynda turǵyndar qala syrtyna ketedi. Sondyqtan jumada múldem oıyn bolmady. Uzyn sonar jol keptelisiniń de aldyn aldyq», - Mostransproekt dırektory Aleksandr Polıakov.
2018 jylǵy álem chempıonatynyń taǵy bir ereksheligi, jankúıerler jer astynda da oıyndy tikeleı efırden tamashalaý múmkindigine ıe boldy.
«18,5 mıllıonnan asa jolaýshy metroda otyryp-aq 50-ge jýyq tikeleı efırdi tamashalap úlgerdi. Mundaı jańashyldyq álem boıynsha bizdiń elde alǵash ret bolyp tur», - deıdi Máskeýlik metropolıtenniń ókili ıÝlııa Temnıkova.
Máskeý bıligi jankúıerler úshin syıymdylyǵy 25 myń adamdy quraıtyn fanzonany usyndy. Dese de fýtbolsúıer qaýym eń kóp jınalǵan aımaq Nıkolskıı kóshesi boldy. Qyzyl alańnan bastap Lýbıankaǵa deıingi aýmaqta kúndiz-túni mereke. Al tórttik fınalǵa Máskeý «Spartak» stadıonynyń janynan taǵy bir jankúıerler alańyn syıǵa tartýdy jón sanaǵan. Sochıde ótetin Reseı-Horvatııa oıynynan bastap bul alań esigin kelýshilerge aıqara ashady.
Eske salaıyq, Reseıde fýtboldan 2018 jylǵy Álem chempıonaty 14 maýsym-15 shilde aralyǵynda ótýde.
