Fýtboldan ÁCh: Marokko quramasy Portýgalııaǵa qarsy 1986 jylǵy jetistigin qaıtalaı ala ma

ASTANA. QazAqparat - Qatarda ótip jatqan fýtboldan 2022 jylǵy álem chempıonatynda búgin, 10 jeltoqsanda jartylaı fınalǵa beriletin úshinshi joldamany Marokko men Portýgalııa sarapqa salady, dep habarlaıdy QazAqparat tilshisi.

Kezdesý elorda ýaqytymen 21.00-de bastalyp, «Qazaqstan» jáne «Qazsport» telearnalarynan tikeleı efırde kórsetiledi.

Oıyn el astanasy Doha qalasyndaǵy 44400 adamǵa arnalǵan «El-Týmama» stadıonynda ótedi. Bas tóreshi - argentınalyq Fakýndo Telo. Oǵan otandastary Esekel Braılovskı men Gabrıel Chade kómekshilik jasaıdy. Qosalqy tóreshi - Ivan Barton.

FIFA reıtınginde Marokko– 22, Portýgalııa 9-orynda tur.

Eki qurama buǵan deıin eki márte kezdesti. 1986 jyly álem chempıonaty fınaldyq satysy altynshy tobynda synǵa túsken Marokko quramasy Portýgalııany 3:1 esebimen tize búktirdi. Al 2018 jylǵy álem chempıonaty fınaldyq satysy V tobynda Portýgalııa atalǵan qarsylasynan 1:0 esebimen basym tústi.

Toptyq kezeńde F tobynda synǵa túsken Marokko Horvatııamen 0:0 esebimen teń túsip, Belgııany 2:0, Kanadany 2:1 esebimen jeńdi. 1/8 fınalda Ispanııamen 0:0 esebimen teń túsip, penaltı tebýden mergendik tanytty.

Al H tobynda Portýgalııa Ganany 3:2, Ýrýgvaıdy 2:0 esebimen jeńip, Ońtústik Koreıaǵa 1:2 esebimen jol berdi. Al 1/8 fınalda Shveıtsarııany 6:1 esebimen qapy qaldyrdy.

Álem chempıonatynda Marokko altynshy márte qatysyp otyr. Buǵan deıin 1986 jyly 1/4 fınalǵa shyqsa, qalǵanynda toptyq kezeńnen asa alǵan joq.

Portýgalııa quramasy jetinshi márte qatysyp, 1966 jyly úshinshi orynǵa turaqtady. Qalǵanynda jarystyń túrli satysynda boldy.

Aıta ketsek, elorda ýaqytymen 1.00-de Anglııa jáne Frantsııa kezdesýi «Qazaqstan» jáne «Qazsport» telearnalarynan tikeleı efırde kórsetiledi.

Eske salsaq, Horvatııa Brazılııany jeńip, jartylaı fınalǵa joldama aldy.

Sondaı-aq, Nıderland quramasyn jeńgen Argentına jartylaı fınalǵa shyqty.

Foto: GETTY IMAGES