Fýtboldan ÁCh: Krıshtıaný Ronaldý Portýgalııany jeńiske bastaı ala ma

Elorda ýaqytymen 19:00-de Ýrýgvaı men Ońtústik Koreıa kezdesýi «Qazsport» telearnasynan tikeleı efırde kórsetiledi.
Eki dúrkin álem chempıony Ýrýgvaı aıtýly alamanda bıyl 13 márte baq synamaq.
Ońtústik Amerıka qurlyǵynyń ókilderi 1930, 1950 jyldarda jeńimpaz tuǵyryna kóterilse, 1954, 1970, 2010 jyldarda tórtinshi oryn aldy.
Al Ońtústik Koreıa álem chempıonatyna 13 márte qadam basty. 2002 jyly tórtinshi oryn alsa, 2010 jyly 1/8 fınalǵa deıin jetti.
Kezdesý Er-Raııan qalasyndaǵy 44667 jankúıerge arnalǵan «Edıýkeıshn Sıtı» stadıonynda ótkiziledi. Bas tóreshi - frantsııalyq Kleman Tıýrpen.
Eki qurama buǵan deıin 11 márte ózara sheberlik baıqasty.
Jeteýinde Ýrýgvaı jeńse, úsheýinde koreılik fýtbolshylardyń mereıi ústem boldy. Bir oıyn teń nátıjemen aıaqtaldy.
Al Portýgalııa men Gana arasyndaǵy kezdesý elorda ýaqytymen 22.00-de «Qazaqstan» telearnasynan tikeleı efırde kórsetiledi.
Krıshtıaný Ronaldý bastaǵan Portýgalııa quramasy dúbirli dodada bıyl jetinshi márte baq synaıdy. Ázirge 1966 jylǵy qola júldeni qanaǵat tutyp júrgen jaıy bar.
Odan keıin 2006 jyly tórtinshi orynǵa turaqtasa, 2010, 2018 jyldarda 1/8 fınalǵa deıin jetti.
Al ganalyq fýtbolshylary álem chempıonay fınaldyq satysyna úshinshi márte keldi. 2010 jyly olar 1/4 fınalǵa deıin jetip, jankúıerge qyzyqty oıyn syılaǵan edi.
Kezdesý el astanasy - Doha qalasyndaǵy 44089 adamǵa arnalǵan «Stedıým 974» stadıonynda ótkiziledi. Bas tóreshi - AQSh-tan kelgen Ismaıl Elfat.
Eki qurama buǵan deıin bir márte kezdesti. 2014 jyldyń 26 maýsymynda álem chempıonatynda G tobynda Portýgalııa atalǵan qarsylasyn 2:1 esebimen tize búktirgen edi.
Eske salsaq, 23 qarashada E tobynda Germanııa Japonııadan jeńilse, Ispanııa Kosta-Rıkadan basym tústi.
Sondaı-aq, F tobynda Marokko men Horvatııa teń túsip, Belgııa Kanadany tize búktirdi.
Foto: OCTAVIO PASSOS/GETTY IMAGES