Fýtboldan ÁCh kezinde 25 mıllıon kıbershabýylǵa toıtarys berildi - Pýtın
MÁSKEÝ. QazAqparat - Reseıde ótken fýtboldan 2018 jylǵy Álem chempıonaty kezinde 25 mıllıonǵa jýyq kıbershabýylǵa toıtarys berildi. Bul týraly RF prezıdenti Vladımır Pýtın chempıonattyń qaýipsizdigin qamtamasyz etý jónindegi Vedomstvoaralyq jedel shtabtyń Halyqaralyq yntymaqtastyq ortalyǵynyń ókilderimen kezdesýinde málim etti, dep habarlaıdy «QazAqparat» HAA Kremldiń resmı saıtyna silteme jasap.
«Reseıdiń arnaıy qyzmetteri men quqyqqorǵaý organdary qyzmetkerlerine, sondaı-aq álemniń 30-dan astam eliniń quqyqqorǵaý organdary men arnaıy qyzmetteriniń ókilderine alǵys bildirgim keledi. Jalpy, bul birlesken jumysqa 34 eldiń 55 arnaıy qyzmeti jáne quqyqqorǵaý organynyń 126 ókili qatysqanyn bilemin», - dedi V.Pýtın.
Reseı basshysy atap ótkendeı, mýndıal nysandarynyń qurylysyna jáne ázirligine, týrnırdi uıymdastyrýǵa jumyldyrylǵan, sondaı-aq eriktiler men adamdardyń ózge de sanattarynan 2 mıllıonnan astam tulǵa tekserildi.
«Álem chempıonaty kezinde 25 mıllıonǵa jýyq kıbershabýylǵa jáne fýtboldan álem chempıonatyn ótkizýge qatysy bolǵan Reseıdiń aqparattyq ınfraqurylymyna jasalǵan ózge de qylmystyq áreketterge toıtarys berildi», - dedi ol.
