Fýtboldan ÁCh: Qazaqstandyqtar qaı matchty kóp tamashalady
ASTANA. QazAqparat - Qazaqstandyqtar Reseıde ótken Álem chempıonatynda eń kóp qaraǵan match - Reseı men Horvatııa arasyndaǵy kezdesý bolǵan. Bul týraly OKQ-da ótken baspasóz máslıhatynda «Qazsport» telearnasynyń dırektory Pavel Tsybýlın aıtty, dep habarlaıdy QazAqparat tilshisi.
«Fýtboldan álem chempıonaty bul barlyq fýtbolsúıer qaýym úshin sport álemindegi mańyzdy da, qýanyshty oqıǵalardyń biri. Ózderińiz biletindeı, «Qazaqstan» jáne «Qazsport» telearnalary fýtbol oıyndarynyń barlyq 64 matchyn tolyǵymen tikeleı efırde kórsetti», - deıdi Erlan Qarın.
Teleradıokorporatsııa basshysynyń aıtýyna qaraǵanda, «Qazaqstan» telearnasynda eń kóp qaralǵan match - Reseı men Mysyr komandalary arasyndaǵy oıyn bolǵan. Ol oıynnyń úlesi 47,7 paıyz, al reıtıngtik turǵyda 6,97 paıyzdy quraǵan. Sondaı-aq, «Qazsport» telearnasynda kórsetilgen Reseı men Horvatııa komandalarynyń oıyny úzdikter qataryna kirip, 44,3 paıyz úlesimen, reıtıngte 7,32 paıyzdyq kórsetkishke jetken. Al qaralym jaǵynan eń tómengi reıtıng - «Shveıtsarııa - Kosta-Rıka» arasyndaǵy match bolǵan.
Belgili bolyp otyrǵandaı, árbir matchtyń ortasha aýdıtorııasy shamamen jarty mıllıonǵa jýyq kórermendi jınaǵan. Sonyń ishinde «LIVE» rejiminde kórsetilim jaǵynan eń joǵarǵy kórsetkishke Reseı-Horvatııa oıyny ıe bolǵany belgili bolyp otyr. «LIVE» rejiminde ol oıyndy 339 455 adam tamashalaǵan. Al atalǵan rejimde Reseı- Saýd Arabııasy oıynyn bar-joǵy 16819 adam qaraǵan bolyp shyqty. Sonymen birge, kórermenderimiz fýtboldy «Qazaqstan TV» qosymshasynan kórý múmkindigine ıe bolǵanyn aıta ketý kerek. Búginge deıin ol qosymsha 263 511 ret júktelgen.
Al «Qazsport» telearnasynyń dırektory Pavel Tsybýlınniń aıtýynsha, qazaqstandyqtar eń kóp qaraǵan match - «Qazsport» telearnasynda bolǵan Reseı - Horvatııa arasyndaǵy oıyn bolǵan. Ony 1 mıllıonnan astam tamashalaǵan.
Eske sala ketsek, fýtboldan Álem chempıonatynyń fınalynda Frantsııa men Horvatııa quramalary kezdesip, Frantsııa jeńiske jetken bolatyn.
